नवी दिल्ली (इंडिया दर्पण वृत्तसेवा) – सुमारे दोन-तीन वर्षांपूर्वी संपूर्ण जगात आहाकार उडविणाऱ्या कोरोनाची पुन्हा एकदा दहशत निर्माण झाली आहे. याला कारण म्हणजे चीन आणि अमेरिकेत पुन्हा कोरोना व्हायरसचा प्रादुर्भाव दिसून येत आहे. चीन आणि अमेरिकेत कोरोना संसर्गाची झपाट्याने वाढ होत असलेल्या पार्श्वभूमीवर भारत सरकारने कोरोनाच्या परिस्थितीबाबत दर आठवड्याला आरोग्य मंत्रालयात आढावा बैठक घेण्याचा निर्णय घेतला आहे.
विशेष म्हणजे कोरोनाच्या ताज्या स्थितीचा आढावा घेण्यासाठी आरोग्यमंत्री मनसुख मांडविया यांच्या तज्ज्ञांसोबत झालेल्या बैठकीत हा निर्णय घेण्यात आला. या बैठकीनंतर नीती आयोगाचे सदस्य व्ही.के. पॉल यांनी माहिती दिली. चीनसह इतर काही देशांमध्ये कोविड-19 संसर्ग झपाट्याने वाढत आहे. यापार्श्वभूमीवर, दर आठवड्याला कोविड परिस्थितीबाबत आढावा बैठक घेण्याचा केंद्र सरकारने घेतला आहे. याशिवाय, ज्यांचे लसीकरण अद्याप बाकी आहे, त्यांनी ते करून घ्यावे आणि गर्दीच्या ठिकाणी मास्कचा वापर करावा, असे आवाहनही केंद्र सरकारने केले आहे.
जगभरात कोरोनाची दहशत पुन्हा एकदा निर्माण झाली आहे. चीनबरोबरच अर्जेंटिना, ब्राझील आणि जपानमध्येही कोरोना रुग्णांची संख्या वेगाने वाढत आहे. विविध देशांमध्ये आठवड्याभरात कोरोनाचे समारे ३६ लाख रुग्ण आढळले आहेत. देशातील कोविडच्या ताज्या स्थितीचा आढावा घेण्यासाठी केंद्रीय आरोग्यमंत्र्यांनी तज्ज्ञांसोबत ही बैठक घेतली.
नवीन प्रकाराचे आव्हान पेलण्यासाठी, संशयित आणि सकारात्मक प्रकरणे लवकर शोधणे, अलग ठेवणे, चाचणी करणे आणि योग्य व्यवस्थापन यावर भर देण्यात आला आहे. सर्व राज्ये आणि केंद्रशासित प्रदेशांना पत्र लिहिले आहे. केंद्रीय आरोग्य सचिव राजेश भूषण यांनी म्हटले आहे की, कोरोनाच्या प्रकारावर लक्ष ठेवण्यासाठी पॉझिटिव्ह नमुन्यांची जीनोम सिक्वेन्सिंग पूर्ण करण्यावर पूर्ण लक्ष दिले पाहिजे. चाचणी-ट्रॅक-ट्रीट-लसीकरण आणि कोविडचा सामना करण्यासाठी मार्गदर्शक सूचनांचे योग्य करणे आवश्यक आहे, कारण जगात त्याचा धोका पूर्णपणे टळलेला नाही.
या बैठकीनंतर नीति आयोगाचे सदस्य (आरोग्य) व्ही. के. पॉल यांनी प्रसार माध्यमांशी संवाद साधत या बैठकीची माहिती दिली. पॉल म्हणाले की, कोरोना अद्याप संपलेला नाही. कोरोनाचा फैलाव इतर देशांत होत असला तरी, याला घाबरण्याची गरज नाही. तथापि, गर्दीच्या ठिकाणी लोकांनी मास्क वापरावा. पुरेशा प्रमाणात टेस्टिंगची सुविधा आहे. त्यामुळे वेळीच टेस्ट करून घ्यावी आणि त्यानुसार उपाय करावेत, असे आवाहन त्यांनी केले. यादरम्यान, काय उपाययोजना करायच्या याचा निर्णय केंद्रीय आरोग्य मंत्रालय घेईल, असेही त्यांनी स्पष्ट केले.
चीनमध्ये कोरोनाचे रुग्ण वाढले आहेत, मात्र आम्ही कोरोनाबाबत सतर्क आहोत. बैठकीत चीनच्या नवीन कोरोना व्हेरिएंटवरही चर्चा झाली, असे सांगून पॉल म्हणाले, देशातील १८ वर्षांपेक्षा जास्त वयाच्या प्रत्येकाला कोरोना प्रतिबंधक प्रिकॉशन डोस मिळायला हवा. केवळ २८ टक्के लोकांनी प्रिकॉशन डोस घेतला आहे. इतरांनी देखील, विशेषत: ज्येष्ठ नागरिकांनी प्रिकॉशन डोस घ्यावे, भारतातील सर्व रुग्णालयांमध्ये येणाऱ्या गंभीर निमोनियाच्या प्रकरणांचा मागोवा घेतला जाईल, असेही पॉल यांनी सांगितले.
Covid Review Meeting Decisions Cough Crowd Mask
