विशेष प्रतिनिधी, नवी दिल्ली
देशावरील कोरोनाचा विळखा हळूहळू सैल होत आहे. अनेक राज्यांनी काही प्रमाणात निर्बंध शिथिल केलेले आहेत. काही ठिकाणी अनलॉक केले जाणार आहे. दिल्ली आणि महाराष्ट्रात कोरोनामुळे उद्भवलेली परिस्थिती नियंत्रणात येत असून, सोमवारपासून (७ जून) अनलॉकची प्रक्रिया सुरू होणार आहे. यामध्ये बाजार, मॉल उघडले जाणार असून, लोकल मेट्रोसेवाही सुरू होणार आहे. राज्यात अनलॉक प्रक्रिया सुरू करण्यापूर्वी पाच पातळीवर योजना तयार करण्यात आली आहे. साप्ताहिक पॉझिटिव्हीटी दर, ऑक्सिजन बेडची संख्या किती या आधारावर नियम तयार करण्यात आले आहेत. या नियमांबाबत प्रत्येक गुरुवारी आढावा घेण्यात येणार आहे.
दिल्लीत सम-विषम पद्धत
दिल्लीचे नायब राज्यपाल अनिल बैजल यांच्या अध्यक्षतेखाली शनिवारी झालेल्या दिल्ली आपकत्कालीन व्यवस्थापन समितीच्या बैठकीनंतर मुख्यमंत्री अरविंद केजरीवाल यांनी याबाबत निर्णय जाहीर केले. अनलॉकच्या दुसर्या टप्प्यात सोमवारपासून बाजार आणि मॉल सम-विषम पद्धतीनुसार खुले होणार आहेत. दुकाने खुले करण्याचा क्रम मार्केट असोसिएशन ठरवणार आहे. मेट्रोसुद्धा ५० टक्के क्षमतेने चालणार आहेत. कोरोनाची परिस्थिती आणखी नियंत्रणात आल्यानंतर इतर सुविधाही लवकरच सुरू होतील, असे केजरीवाल म्हणाले.
दिल्लीत या गोष्टी सुरू
– बाजार, मॉल, शॉपिंग कॉम्प्लेक्स सकाळी १० ते रात्री आठ वाजेपर्यंत सुरू राहतील. गल्लीत, रस्त्याच्या बाजूची दोन-चार दुकाने रोज उघडण्याची परवानगी आहे.
– आवश्यक सेवांमध्ये काम करणार्या सर्व कर्मचार्यांची तसेच ई-कॉमर्स कंपन्यांची होम डिलिव्हरी सुरू राहील.
– सरकारी कार्यालयांमध्ये अ गटातील कर्मचार्यांची शंभर टक्के उपस्थिती अनिवार्य असेल. त्याखालील ५० टक्के कर्मचारी कार्यालयात येऊ शकतील.
– खासगी कार्यालयांमध्ये ५० टक्के कर्मचार्यांना सकाळी ९ ते सायंकाळी ५ वाजेपर्यंत काम करता येईल.रस्त्यावर लोकांची गर्दी होणार नाही असा पद्धतीने कामाच्या वेळा ठरवाव्यात.
यांना परवानगी नाही – जिम, स्पा, सलून, मनोरंजन पार्क, वॉटर पार्क, सार्वजनिक पार्क, उद्याने, सभागृहे, संग्रहालये, साप्ताहिक बाजार, शिक्षण आणि कोचिंग क्लास, सिनेमा आणि थिएटर, रेस्टॉरंट आणि बार, ब्यूटि पार्लर आणि जलतरण तलाव.
महाराष्ट्रात अनलॉक प्रक्रिया सुरू
राज्यात अनलॉक प्रक्रिया सुरू करण्यासाठी जिल्ह्यांना पाच गटात विभागण्यात आले. पहिल्या गटातील जिल्ह्यांना सर्वांत जास्त सूट देण्यात आली आहे.तर पाचव्या गटातील जिल्ह्यांमध्ये निर्बंध कायम राहणार आहेत.
पहिला गट – जेथे पॉझिटिव्हीटी दर पाच टक्क्यांहून कमी, ऑक्सिजन बेड २५ टक्क्यांहून कमी हवेत.
दुसरा गट – जेथे पॉझिटिव्हीटी दर पाच टक्क्यांहून कमी, ऑक्सिजन बेड २५ ते ४० टक्क्यांपर्यंत असावेत.
तिसरा गट – जेथे पॉझिटिव्हीटी दर पाच ते दहा टक्के तसेच ऑक्सिजन बेड ४० टक्क्यांहून अधिक असतील.
चौथा गट – जेथे पॉझिटिव्हीटी दर १० ते २० टक्क्यांच्या मध्ये तसेच बेड ६० टक्क्यांहून अधिक असतील.
पाचवा गट – जेथे पॉझिटिव्हीट दर २० टक्क्यांहून अधिक तसेच ऑक्सिजन बेड ७५ टक्क्यांहून अधिक असतील.
कुठे काय सुरू
पहिला गट – लोकल सुरळीत चालतील. दुसरा गट – आरोग्य कर्मचारी तसेच अत्यावश्यक सेवेत काम करणार्यांना लोकल प्रवासाला परवानगी. पहिल्या गटात रेस्टॉरंट सुरू होतील. दुसर्या गटात ५० टक्के क्षमतेने सुरू रेस्टॉरंट सुरू राहतील. तिसर्या गटात आठवड्यातील कामाच्या दिवसात ५० टक्के क्षमतेने संध्याकाळी चार वाजेपर्यंत रेस्टॉरंट सुरू राहतील. त्यानंतर पार्सल आणि होम डिलिव्हरी सेवा सुरू राहतील. चौथ्या आणि पाचव्या गटात आधीसारखेच निर्बंध कायम राहतील.
तामिळनाडूमध्ये लॉकडाउन वाढविला
तामिळनाडूमध्ये १४ जूनपर्यंत लॉकडाउन वाढविण्यात आला आहे. सर्वाधिक रुग्ण आढळणार्या ११ जिल्ह्यांना वगळून सोमवारपासून इतर जिल्ह्यांमध्ये निर्बंध शिथिल केले जाणार आहेत. कर्नाटकमध्येही १४ जूनपर्यंत लॉकडाउन वाढविण्यात आला आहे. हिमाचल प्रदेश आणि गोव्यात कोरोना संचारबंदीत वाढ करण्यात आली आहे.
