अनेक देशांमध्ये पुन्हा कोरोनाचा कहर; लसीकरणानंतरही अमेरिकेत अशी आहे स्थिती

नवी दिल्ली – संपूर्ण जगाला हादरवून सोडणार्‍या कोरोनाची भीती कमी होईल, असे वाटत असतानाच आता पुन्हा एकदा हे संकट अधिकच गडद होत चालले आहे. विशेषत: अमेरिका, रशिया, ब्राझीलसह जगातील अनेक देशांमध्ये कोरोनाचा कहर सुरूच आहे. जॉन्स हॉपकिन्स विद्यापीठाच्या अहवालात म्हटले आहे की, जगातील लसीकरण उद्दीष्ट ४.३४ अब्ज पार झाले आहे. तरीही नवे बाधित आणि मृत्यूच्या संख्येच्या बाबतीत अमेरिका अजूनही साथीच्या रोगाने सर्वाधिक प्रभावित देश आहे. जगातील कोरोना बाधितांची संख्या २०१ दशलक्षांपुढे गेली आहे. तर मृतांची संख्या ४२ लाखांपेक्षा जास्त झाली आहे.

अमेरिका
एका अहवालानुसार, अमेरिकेत दररोज सरासरी एक लाख कोरोनाची नवीन प्रकरणे समोर येत आहेत. विशेषत : कोरोनाचा डेल्टा प्रकार देशभरात वेगाने पसरत आहे. दक्षिण अमेरिकेतील फ्लोरिडा, लुइसियाना आणि मिसिसिपी येथील रुग्णालये रुग्णांनी भरलेली आहेत. अमेरिकेत कोरोना बाधितांची संख्या वाढून सुमारे ३५ लाखांपेक्षा जास्त झाली आहे तर साथीमुळे सुमारे ६ लाख लोकांचा मृत्यू झाला आहे.

ब्राझील
कोरोना संसर्गामुळे ब्राझीलमधील परिस्थिती दिवसेंदिवस अनियंत्रित होत आहे. आरोग्य मंत्रालयाच्या म्हणण्यानुसार, ब्राझीलमध्ये गेल्या २४ तासांमध्ये साथीमुळे १०५६ लोकांचा मृत्यू झाला आहे. ब्राझीलमध्ये कोरोनामुळे मृत्यू झालेल्यांची एकूण संख्या ५ लाख ६१ हजार झाली आहे. गेल्या २४ तासांत कोरोनाचे ४२,१५९ नवीन रुग्ण आढळले असून, संक्रमित रुग्णांची संख्या वाढून सुमारे २ कोटी झाली आहे.

रशिया
रशियामध्येही कोरोना संसर्गामुळे मोठ्या प्रमाणात लोक मरत आहेत. रशियामध्ये गेल्या २४ तासांमध्ये २२,३२० नवीन संसर्ग झाल्याची नोंद झाली आहे, ज्यात संक्रमित लोकांची संख्या ६४ लाख २४ हजार झाली आहे. रशियामध्ये, एका दिवसात साथीमुळे ७९३ लोकांचा मृत्यू झाला आहे, ज्यात मृतांची संख्या १ लाख ६४ हजार झाली आहे.

चीन
डेल्टा प्रकार चीनमध्ये वेगाने पसरत आहे. ते अनेक शहरांमध्ये पसरले आहे. राजधानी बीजिंगमध्ये संसर्ग रोखण्यासाठी अनेक पावले उचलण्यात आली आहेत. शहराबाहेरून येणाऱ्या लोकांना नकारात्मक चाचणी दाखवावी लागेल. दरम्यान, गेल्या २४ तासांत देशभरात १०७ नवीन प्रकरणे आढळली.

पाकिस्तान
पाकिस्तानमध्ये चौथ्या लाटेत गेल्या २४ तासांमध्ये जास्तीत जास्त ९५ बळी गेले. या दरम्यान ४,७२० नवीन संक्रमित आढळले. येथे दैनंदिन संसर्गाचे प्रमाण वेगाने वाढत आहे. पाकिस्तानमध्ये संसर्गाचे प्रमाण नऊ टक्क्यांपेक्षा जास्त आहे.