नाशिक – सर्वोच्च न्यायालयाच्या निर्देशानुसार कोविड 19 मुळे मृत पावलेल्या व्यक्तिच्या वारसांना 50 हजार रुपयांचे सानुग्रह अनुदान जिल्हा आपत्ती व्यवस्थापन प्राधिकरणामार्फत त्वरेने देण्यात येणार आहे. याबाबत संबंधितांना काही अडचण असल्यास जिल्हा आपत्ती व्यवस्थापन प्राधिकरणांतर्गत जिल्हा व महानगरपालिका स्तरावर मदत व तक्रार निवारण कक्ष गठीत करण्यात आला आहे, अशी माहिती जिल्हाधिकारी सूरज मांढरे यांनी शासकीय प्रसिद्धी पत्रकान्वये दिली आहे.
शासकीय प्रसिद्धी पत्रकात नमुद केल्यानुसार, महसूल व वन आपत्तीव्यवस्थापन, मदत व पुनर्वसन विभागाने प्रसारीत केलेल्या शासन निर्णयान्वये कोविड-19 आजारामुळे मृतांच्या निकटच्या नातेवाईकास सानुग्रह स्वरूपात मदत करण्यासाठी कमीत कमी कागदपत्रांच्या आधारे अर्ज सादर करण्यासाठी mahacovid19relief.in व https://epassmsdma.mahait.org/login.htm ही संकेतस्थळे उपलब्ध असून त्यावर सविस्तर माहिती उपलब्ध करून देण्यात आली आहे. त्याशिवाय काही अडचण वाटल्यास जिल्ह्यातील ग्रामीण भागासाठी जिल्हा शल्य चिकित्सक मदत कक्ष 9607263456, नाशिक महानगरपालिका क्षेत्रासाठी 0253-2317292, 9607643366 व मालेगाव महानगरपालिका क्षेत्राकरिता 8956443070, 8956443068 हे मदत कक्ष व संपर्क क्रमांक निश्चित करण्यात आले आहेत असे जिल्हाधिकारी श्री. मांढरे यांनी प्रसिद्धी पत्रकान्वये कळविले आहे.
मृत व्यक्तिच्या निकटच्या नातेवाईकास आपल्या भ्रमणध्वनीवरून स्वत:चा आधार क्रमांक, मृत व्यक्तीचे मृत्यु प्रमाणपत्र व रूग्णालयाचा तपशील या कागदपत्रांच्या आधारे लॉगइन करता येणार आहे. अंतिमत: मंजूर करण्यात आलेल्या अर्जानुसार सानुग्रह सहाय्याची रक्कम थेट अर्जदाराच्या आधार संलग्न बँक खात्यात जमा करण्यात येणार असल्याची माहितीही जिल्हाधिकारी सूरज मांढरे यांनी शासकीय प्रसिद्धी पत्रकान्वये दिली आहे.
केंद्र शासनाकडे ज्यांचा कोविड-19 या आजाराने मृत्यु झाल्याची नोंद झालेली आहे, अशा व्यक्तिंच्या नातेवाईकांचा अर्ज इतर कोणत्याही कागदपत्रांची मागणी न करता मंजूर करण्यात येणार आहे. इतर प्रकरणी कोविड-19 मुळे मृत्युचे कारण दर्शविणारे वैद्यकीय प्रमाणपत्र असेल तर अशी प्रकरणे देखील माहितीची शहानिशा करून मंजूर करण्यात येणार आहेत. अर्जदाराकडे मृत्युचे कारण दर्शविणारे वैद्यकीय प्रमाणपत्र नसेल तर कोविड-19 मुळे मृत्यु झाल्याच्या पुष्ठ्यर्थ कागदपत्रे अर्जदारास अर्जासोबत सादर करावे लागणार आहेत, असेही जिल्हाधिकारी सूरज मांढरे यांनी शासकीय प्रसिद्धी पत्रकान्वये सांगितले आहे.
ही कागदपत्रे व माहिती बंधनकारक
◼️अर्जदाराचा स्वत:चा तपशील, आधार क्रमांक किंवा आधार नोंदणी क्रमांक.
◼️अर्जदाराचा स्वत:चा बँक तपशील.
◼️मृत पावलेल्या व्यक्तीचा आधार तपशील किंवा आधार नोंदणी क्रमांक, वैद्कीय प्रमाणपत्र (Medical Certificate of cause of Death) /RT-PCR/Molecular Tests/RAT Positive अहवाल अथवा रुग्णालयात दाखल असतांना करण्यात आलेल्या आरोग्य चाचण्यांचा अहवाल तसेच अर्जदाराच्या मते हा मृत्यू कोविड-१९ मुळे झाल्याचे सिद्ध करत असेल, अशी इतर कोणतीही कागदपत्रे.
◼️मृत पावलेल्या व्यक्तीचे जन्म व मृत्यू नोंदणी अधिनियम, १९६९ खालील मृत्यू प्रमाणपत्र
◼️इतर निकट नातेवाईकांचे नाहरकत असल्याचा स्वयं घोषणापत्र
