चीनच्या आणखी एका शहरात लॉकडाऊन; अन्य देशात आहे ही स्थिती

इंडिया दर्पण ऑनलाईन डेस्क – गेल्या दोन वर्षापासून जगभरात कोरोनाचा संसर्ग कायम असून एक लाटेनंतर दुसरी येते, त्यानंतर तिसरी सुरू होते, त्यामुळे संपूर्ण जगातील अनेक देशात अद्यापही भिती जाणवत आहे. जगभरात झपाट्याने पसरणाऱ्या कोरोनाच्या प्रकरणांमध्ये गेल्या 24 तासांत 18.5 लाख नवीन संसर्गाची नोंद झाली आहे, तर याच कालावधीत 3,489 नागरिकांचा मृत्यू झाला आहे. आतापर्यंत कोविड-19 चा जागतिक आकडा 30.80 कोटींच्या पुढे गेला आहे.

विविध देशांमध्ये अशी आहे सद्यस्थिती
चीन
एका दिवसात ओमिक्रॉन आणि कोरोनाची एकूण 40 प्रकरणे समोर आल्यानंतर चीनमधील तिआनजिनमध्ये आंशिक लॉकडाऊन लागू करण्यात आला होता. दि. 4 फेब्रुवारीपासून देशात सुरू होणाऱ्या शीत ऑलिम्पिकपूर्वी चीनने संसर्गाबाबत कडक धोरण स्वीकारले आहे. सरकारने तियानजिनची 1.4 दशलक्ष लोकसंख्या तीन भागांमध्ये विभागून निर्बंध लादले आहेत. पहिल्या टप्प्यात नागरिकांना घराबाहेर पडण्याची परवानगी नाही. त्याच वेळी, टियांजिन ते बीजिंगपर्यंत बस-ट्रेन सेवा बंद करण्यात आली आहे आणि शहरी लोकांना अगदी आवश्यक असल्याशिवाय ठिकाण सोडू नका, असे सांगण्यात आले आहे. दुसरीकडे, चीनमधील शियान आणि युझू शहरे दोन आठवड्यांपूर्वी लॉकडाऊनचा सामना करत आहेत.

अमेरिका
अमेरिकेत 3.08 लाख नवीन संक्रमित रुग्ण आढळले आहेत तर फ्रान्समध्ये 2.96 लाख लोकांना संसर्ग झाल्याचे आढळले आहे. अमेरिकेतील सक्रिय प्रकरणांवर नजर टाकली तर 181 कोटी नागरिक प्रभावित आहेत. यात सक्रिय प्रकरणे म्हणजे ते रुग्ण उपचार घेत आहेत.

ब्रिटन
ब्रिटन सरकारसमोर शाळांबाबत एक नवी समस्या निर्माण झाली आहे. देशातील अनेक शाळांमध्ये शिक्षक आणि इतर कर्मचाऱ्यांची तीव्र कमतरता आहे. त्यामुळे वर्ग सुरू ठेवणे अत्यंत कठीण होत आहे. दोन वर्षे बंद राहिल्यानंतर किमान आता तरी शाळा आणि इतर शैक्षणिक संस्था खुल्या राहाव्यात, अशी सरकारची आणि काही पालकांची इच्छा आहे, परंतु आता उघडलेल्या शाळाही लवकरच बंद होऊ शकतात, अशी परिस्थिती दिसून येत आहे.

सिंगापूर
सिंगापूरचे आरोग्य मंत्री ओंग ये कुंग यांनी संसदेत सांगितले की, देशात कोरोनाच्या ओमिक्रॉन प्रकाराची लाट मागील डेल्टा प्रकारामुळे निर्माण झालेल्या लहरीपेक्षा ‘अनेक पटीने मोठी’ असू शकते. ओमिक्रॉनची प्रकरणे दर दोन ते तीन दिवसांनी दुप्पट होण्याची अपेक्षा आहे, असेही मंत्री म्हणाले. आतापर्यंत, सिंगापूरमध्ये ओमिक्रॉनची 4,322 प्रकरणे नोंदवली गेली आहेत, ज्यात 60 वर्षे किंवा त्याहून अधिक वयाच्या 308 लोकांचा समावेश आहे.

रोम
पोप फ्रान्सिस यांनी सांगितले की, कोरोना व्हायरस विरूद्ध लढा देताना लशीकरण करणे ही नैतिक जबाबदारी आहे. जीव वाचवण्याचा सर्वात प्रभावी मार्ग म्हणून त्यांनी लशीकरण यशस्वी करण्याचे आवाहन केले. आता 85 वर्षीय पोप यांचे विधान महत्त्वपूर्ण आहे, कारण त्यांनी या पुर्वी अनेकदा नैतिक बंधन म्हणून लशीकरणाबद्दल बोलण्यास टाळाटाळ केली आहे. आता फ्रान्सिस यांनी लशीकरणाला प्रेमाचे कृत्य म्हटले आहे.

नेपाळ
नेपाळच्या COVID-19 टास्क फोर्सने देशात संसर्ग वाढू नये म्हणून मेळाव्यावर बंदी घालणे, शाळा बंद करणे आणि सार्वजनिक ठिकाणी लसीकरण कार्ड अनिवार्य करण्याच्या शिफारसी केल्या आहेत. आरोग्य मंत्रालयाने जारी केलेल्या आकडेवारीनुसार, रविवारी नेपाळमध्ये कोविड-19 चे 1,167 नवीन रुग्ण आढळले आणि 224 लोक बरे झाले, तर दोन रुग्णांचा मृत्यू झाला. कोविड क्रायसिस मॅनेजमेंट कोऑर्डिनेशन सेंटर (CCMCC) ने देशातील महामारीचा सामना करण्यासाठी अनेक शिफारसी जारी केल्या आहेत. यामध्ये २५ पेक्षा जास्त लोकांच्या एकत्र येण्यावर निर्बंध समाविष्ट आहेत.

दक्षिण आफ्रिका
कोरोनाची प्रथिने-आधारित लस निर्माता नोव्हावॅक्सने एका निवेदनात म्हटले आहे की, आम्ही आणि आमच्या भागीदार सीरम इन्स्टिट्यूट ऑफ इंडियाने आमच्या लसीच्या आणीबाणीच्या वापरासाठी (EUA) अर्जाची प्रक्रिया दक्षिण आफ्रिकेच्या औषध नियामक प्राधिकरणासमोर पूर्ण केली आहे.