विशेष प्रतिनिधी, मुंबई
आजच्या काळात प्रत्येकालाच वाटते की आपल्याकडे स्वस्त, किफायतशीर आणि दमदार वाहन किंवा कार हवी. यासाठीच देशातील सर्वात मोठी कार निर्माता मारुती सुझुकी कंपनी एक नवी कार घेऊन येत आहे. देशांतर्गत बाजारात आपला स्पोर्ट युटिलिटी व्हेकल (एसयूव्ही) पोर्टफोलिओ वाढविण्याची कंपनी तयारी करत आहे.
ग्राहकांना परवडणारी
मारुती कंपनी येत्या काही दिवसांत बाजारात ५ नवीन मॉडेल्स सादर करणार असून त्यामध्ये ग्राहकांना परवडणारी कॉम्पॅक्ट एसयूव्ही ‘वायटीबी’ चा समावेश आहे. कंपनीकडून येणाऱ्या आगामी मॉडेल्सपैकी १ एमपीव्ही आणि ४ एसयूव्ही मॉडेल्स असतील.
नवीन एसयूव्ही ही कंपनीच्या प्रीमियम हॅचबॅक कार बालेनोवर आधारित असेल. सध्याची मारुती बालेनो पेक्षाही ही नवीन एसयूव्ही किंचित महाग राहील यात शंका नाही. पण मारुती सुझुकी केवळ बाजारात परवडणाऱ्या मॉडेल्ससाठीच ओळखली जात आहे, म्हणून कंपनी कारची किंमत कमीत कमी ठेवण्याचा प्रयत्न करेल, अशी अपेक्षा आहे.
एसयूव्ही कशी असेल
या एसयूव्हीमध्ये कंपनी मिशन ग्रीन मिलियन प्रकल्पांतर्गत पेट्रोल-इलेक्ट्रिक हायब्रिड सिस्टम वापरणार आहे. त्यामुळे कारला अधिक चांगले मायलेज देण्यास मदत होईल. कंपनी या एसयूव्हीला कूप डिझाइन देऊ शकते. गेल्या ऑटो एक्सपोमध्ये सादर केलेल्या कंपनीच्या कन्सेप्ट मॉडेल फुटुरो-ईमध्ये काही ग्राहकांनी ते पाहिले आहे.
