इंडिया दर्पण ऑनलाईन डेस्क – मुख्यमंत्री योगी आदित्यनाथ यांनी देशाच्या विविध भागांमध्ये समोर आलेल्या सामुदायिक संघर्षाच्या घटना पाहता पोलिस प्रशासनाला सतर्क राहण्याचे निर्देश दिले आहेत. ३ मे रोजी अक्षय्य तृतीया आणि ईदचा सण एकाच दिवशी असल्याने कायदा व सुव्यवस्था राखण्यासाठी आवश्यक पावले उचलण्यास त्यांनी सांगितले आहे. यासोबतच माईकवर अजान आणि हनुमान चालिसा पठणावरून सुरू झालेल्या नव्या वादात त्यांनी धार्मिक स्वातंत्र्य सर्वांनाच आहे, मात्र माईकचा आवाज कॅम्पसच्या बाहेर जाऊ नये, असे स्पष्टपणे सांगितले आहे.
राज्यातील कायदा व सुव्यवस्था राखण्यासाठी मुख्यमंत्री योगी आदित्यनाथ यांनी सोमवारी राज्यभरातील पोलिस प्रशासनाच्या वरिष्ठ अधिकाऱ्यांची व्हिडिओ कॉन्फरन्सिंगद्वारे महत्त्वपूर्ण बैठक घेतली. आगामी काळात अनेक महत्त्वाचे सण आहेत, असा इशारा त्यांनी अधिकाऱ्यांना दिला. रमजानचा महिना सुरू आहे. ईद सण आणि अक्षय्य तृतीया एकाच दिवशी असण्याची शक्यता आहे. सध्याचे वातावरण पाहता पोलिसांना अधिक संवेदनशील राहावे लागणार आहे.
सीएम योगी आदित्यनाथ म्हणाले की, आजकाल अनेक ठिकाणी अजान आणि हनुमान चालिसासाठी माईक लावण्यावरून वाद सुरू आहे. ही बाब गांभीर्याने घेत धार्मिक विचारधारेनुसार प्रत्येकाला आपली उपासना पद्धती पाळण्याचे स्वातंत्र्य असल्याचे त्यांनी स्पष्ट केले. माइकचा वापर करता येईल, मात्र माईकचा आवाज आवारातून बाहेर येणार नाही याची काळजी घेतली पाहिजे. इतर लोकांची गैरसोय होऊ नये. त्याचबरोबर नवीन ठिकाणी माईक लावण्यास परवानगी दिली जाणार नाही.
याशिवाय हनुमान जयंतीच्या मिरवणुकीत अनेक राज्यांत अशांतता पसरली होती, सामुदायिक हिंसाचाराच्या घटना घडल्या होत्या. या पार्श्वभूमीवर सीएम योगी आदित्यनाथ म्हणाले की, परवानगीशिवाय कोणतीही मिरवणूक किंवा धार्मिक मिरवणूक काढू नये. परवानगी देण्यापूर्वी आयोजकांकडून शांतता आणि सलोखा राखण्याबाबत प्रतिज्ञापत्र घ्या. प्रत्येक सण शांततेत आणि सौहार्दाने साजरे व्हावेत, त्यासाठी स्थानिक गरजा लक्षात घेऊन आवश्यक ते प्रयत्न केले पाहिजेत, असे मुख्यमंत्री योगी यांनी म्हटले आहे. खोडसाळ विधाने करणाऱ्या आणि वातावरण बिघडवण्याचा प्रयत्न करणाऱ्यांशी कठोरपणे व्यवहार करा. धार्मिक कार्यक्रम, पूजा आदी ठराविक ठिकाणीच व्हावेत, असे निर्देश त्यांनी दिले.
