मुंबई (इंडिया दर्पण वृत्तसेवा) – महाराष्ट्रातील तमाम जनतेने दिलेल्या मतरूपी आशीर्वादामुळे महायुतीचा महाविजय झाला. या महाविजयाचे खरे श्रेय हे लाडक्या बहिणींचे आहे. लाडक्या भावाच्या पाठीशी खंबीरपणे उभी राहून दिलेली साथ ही विधानसभा निवडणुकीत लाडक्या बहिणींनी अवघ्या महाराष्ट्राला दाखवून दिली. त्यामुळेच महायुतीला विजयी यश प्राप्त झाले. याच विजयाचा आनंद रविवारी लाडक्या बहिणींनी मुख्यमंत्री एकनाथ शिंदे यांच्या वर्षा निवासस्थानी साजरा केला.
यावेळी लाडक्या बहिणींनी लाडक्या भावाचे औक्षण करून विजयाच्या शुभेच्छा दिल्या. तसेच फुगडी घालत, नृत्य करत एकच जल्लोष केला. लाडक्या बहिणींच्या चेहऱ्यावरील आनंद पाहून मुख्यमंत्री शिंदे यांनी लाडक्या बहिणींच्या पाठीशी सदैव असल्याचा विश्वास व्यक्त केला. तर मुख्यमंत्री माझी लाडकी बहिण योजनेचे १५०० हजारांऐवजी २१०० रूपये लवकरच देणार असल्याची ग्वाही त्यांनी दिली. वर्षावरील आजचा हा जल्लोष, आनंद पाहून लाडक्या बहिणींचे लाडक्या भावावरचे असलेले प्रेम पुन्हा एकदा अधोरेखित झाले.
