नाशिक (इंडिया दर्पण वृत्तसेवा) नाशिक जिल्हा रुग्णालय येथे दैनंदिन रुग्णसेवा सुरु असतांना दुपारी २ वाजेच्या सुमारास नवजात शिशु अतिदक्षता विभागाच्या बाहेरील वरंडयामधील वीजेच्या तारांमधुन ठिणग्या उडाल्यानंतर सेफटी स्वीच ट्रीप झाल्याने कार्यरत कर्मचाऱ्यांच्या लक्षात आले. नवजात शिशु अतिदक्षता विभागाच्या कर्मचाऱ्यांनी ठिणग्या उडत असलेल्या जागेवर आग विरोधक उपकरणांचा तात्काळ उपयोग करत नियंत्रण मिळविले.
दरम्यान नवजात शिशु अतिदक्षता विभागातील वैद्यकिय अधिकारी/परिचारीका/चतुर्थश्रेणी कर्मचारी या सर्वांनी प्रशासनाच्या सुचनेनुसार उपचारार्थ दाखल झालेल्या सर्व नवजात बालकांना बालरोग् विभागातील आरक्षित असलेल्या सुरक्षित ठिकाणी स्थलांतरीत केले. नवजात शिशु अतिदक्षता विभागाकरीता जिल्हा रुग्णालयात पर्यायी नवजात अतिदक्षता विभाग उपलब्ध होता.
जिल्हा रुग्णालयाच्या आरोग्य प्रशासनाने तात्काळ दखल घेवुन सदर प्रकरणाची माहिती विद्युत विभाग यांना दिल्याने सार्वजनिक बांधकाम (विद्युत) विभागातील इंजिनीअर तात्काळ घटनास्थळी हजर होवुन विजेच्या केबल दुरुस्त करुन विजपुरवठा नियमित सुरु करण्यात आला. विजपुरवठा सुरळीत सुरु झाल्यानंतर स्थलांतरीत केलेले नवजात शिशु हे पुन्हा नवजात शिशु अतिदक्षता विभागात स्थलांतर करण्याचे काम रुग्णालय प्रशासनाकडुन सुरु आहेत.
या दोन्ही घटनास्थळीचा विद्युत पुरवठा थोड्याच वेळेत पुर्ववत चालु करण्यात आला. सदर घटनेदरम्यान व त्यानंतर रुग्णव्यवस्थापन नियमित सुरळीत सुरु आहेत. तसेच सदर घटनेमध्ये कुठलेही नुकसान झालेले नाही अशी माहिती जिल्हा रुग्णालयाच्या प्रशासनाने दिली.
