चारधाम यात्रेसाठी प्रवाशांना मिळणार हँडबँड; पण का? असे आहेत त्याचे फायदे

अश्विनी कावळे, इंडिया दर्पण वृत्तसेवा
चारधाम यात्रेकरूंच्या नोंदणीनंतर त्यांना पर्यटन विकास परिषदेकडून काउंटरवर हायटेक हँडबँड दिला जाणार आहे. तो हँडबँड ज्या प्रवाशांनी मोबाईल अॅपवर नोंदणी केली आहे त्यांना त्यांच्या मोबाईलवर क्यूआर कोड स्कॅन करण्यासाठी मिळणार आहे. हँडबँड स्कॅन होताच प्रवाशाची सर्व माहिती ट्रॅव्हल्स प्रशासन, पोलिस आणि संबंधित विभागांना उपलब्ध होणार आहे.
चारधाम यात्रेच्या तयारीसंदर्भात सोमवारी झालेल्या आढावा बैठकीत पर्यटन विकास परिषदेचे संशोधन अधिकारी एस. एस. सामंत यांनी महापालिकेच्या सभागृहात प्रोजेक्टरद्वारे नोंदणीबाबत सादरीकरण केले. नोंदणीनंतर प्रवाशांना हायटेक हँडबँड दिला जाईल, असे त्यांनी गढवालचे आयुक्त सुशील कुमार यांना सांगितले. प्रवाशांची सुरक्षितता लक्षात घेऊन ही व्यवस्था करण्यात आली आहे. हँडबँडमध्ये प्रवाशाची सर्व माहिती फेड केली जाईल, संबंधित विभागाचे अधिकारी हँडबँड स्कॅन करताच त्यांना प्रवाशाची सर्व माहिती मिळेल.

ऋषिकेश गढवालचे आयुक्त सुशील कुमार म्हणाले की, सर्व विभागांना त्यांच्या विभागात चारधाम यात्रेसाठी नोडल अधिकारी नियुक्त करावे लागतील. ते अधिकारी चारधाम यात्रा प्रशासनाशी समन्वय ठेवतील. चिडियापूर बॉर्डर, नरसन बॉर्डर, आशारोडी बॉर्डर आणि कुल्हाळ बॉर्डर अशा एकूण २२ ठिकाणी प्रवाशांच्या नोंदणीसाठी किऑस्क मशिन बसवण्यात येणार आहेत.
कोविडचा संसर्ग रोखण्यासाठी उपाययोजना कराव्या लागतील, अशा सूचना आयुक्तांनी आरोग्य विभागाच्या अधिकाऱ्यांना दिल्या. प्रवासाच्या मार्गावर ऑक्सिजन सिलिंडर आणि इतर आवश्यक औषधांसह डॉक्टरांना तैनात करावे लागेल. तसेच प्रवाशांच्या सोईसाठी वॉटर एटीएम बसवण्यात येणार आहे. याबरोबरच, पर्यटकांची, प्रवाशांची आर्थिक लूट होऊ नये, भेसळयुक्त अन्न विक्री होऊ नये यासाठी अधिकारीवर्गाकडून सातत्याने तपासणीदेखील करण्यात येणार आहे. तसेच स्वच्छतागृह, बसेसची चोख व्यवस्था करण्यावर लक्ष देण्याचा मानस स्थानिक प्रशासनाने व्यक्त केला आहे.

नोंदणी आवश्यक
चारधाम यात्रेला जाणाऱ्या यात्रेकरूंनी आपली नोंदणी करणे आवश्यक आहे. प्रवाशांना https//registrationandtouristcare.uk.gov.in वर स्वतःची नोंदणी करावी लागेल. नोंदणी वेब पोर्टल, नोंदणी केंद्र, मोबाईल अॅप, यात्री मित्र याद्वारे केली जाऊ शकते. हरिद्वार राही मोटेल, लेकर जॉइंट बस स्टँड ऋषिकेश, गुरुद्वारा ऋषिकेश, बद्रीनाथ मार्ग, केदारनाथ, गंगोत्री, यमुनोत्री मार्गावर ऑफलाइन नोंदणी प्रणाली आहे. त्याचबरोबर केदारनाथसाठी हेली नोंदणी सेवा सुरू झाली आहे. https://heliservices.uk.gov.in आणि श्री बद्रीनाथ श्री केदारनाथ धामच्या पूजांचे ऑनलाइन बुकिंग http://badrinath-kedarnath. uk.gov.in वर उपलब्ध आहे.