मुंबई (इंडिया दर्पण वृत्तसेवा)- ‘णमोकार तीर्थ’ पर्यटनाच्या दृष्टीने विकसित करण्यासाठी प्रशासनाने लक्ष द्यावे. फेब्रुवारी महिन्यात होणा-या ‘पंचकल्याण प्रतिष्ठान महोत्सव जैन कुंभ मेळ्याच्या’ अनुषंगाने तात्काळ व दीर्घ कालावधीत होणा-या कांमाचा सुधारित प्रस्ताव शासनाला सादर करण्याच्या सूचना मुख्यमंत्री देवेंद्र फडणवीस यांनी केल्या.
सह्याद्री अतिथीगृह येथे नाशिक जिल्‌हयातील चांदवड तालुक्यातील मौजे मालसाने येथे जैन समाजाचे 'णमोकार तीर्थक्षेत्र', येथे 'पंचकल्याण प्रतिष्ठान महोत्सव जैन कुंभ मेळा' आयोजनासंदर्भात आढावा बैठकीत मुख्यमंत्री देवेंद्र फडणवीस बोलत होते.यावेळी उपमुख्यमंत्री एकनाथ शिंदे,उपमुख्यमंत्री अजित पवार,अन्न,नागरी पुरवठा व ग्राहक सरंक्षण मंत्री छगन भुजबळ,जलसंपदा व आपत्ती व्यवस्थापन मंत्री गिरीश महाजन, शालेय शिक्षण मंत्री दादाजी भुसे,आमदार राहुल आहेर,उत्सव समिती सदस्य संतोष पेंढारी, जैन अल्पसंख्याक वित्त मंडळाचे अध्यक्ष ललीत गांधी, नाशिकचे विभागीय आयुक्त डॉ.प्रविण गेडाम,जिल्हाधिकारी जलज शर्मा यावेळी उपस्थित होते. मुख्यमंत्री देवेंद्र फडणवीस म्हणाले की, 'णमोकार तीर्थ' हे फक्त धर्मस्थळ म्हणून याचे मोठे महत्व आहे. आगामी कालावधीत होणा-या 'पंचकल्याण प्रतिष्ठान महोत्सव जैन कुंभ मेळ्यासाठी मोठया संख्येने भाविक येतात हे लक्षात घेता. स्थानिक ठिकाणी येणा-या भाविकांसाठी रस्ते,तात्पुरते निवास,पार्किंग सह इतर जी तात्काळ करावी लागणारी कामे प्रथम करून घेण्यात यावीत. दीर्घकालावधीत करता येणा-या कामांचा प्रस्ताव शासनाला सादर करावा जेणकरून केंद्र व राज्य शासनाच्या योजनामधून ही कामे करण्यासाठी विचारात घेता येतील. विकास आराखड्यातील स्थायी व अस्थायी कामांची यादी प्राधान्यक्रम घेवून तयार करावी. विभागीय आयुक्त्‍ आणि स्थानिक प्रशासन व 'पंचकल्याण प्रतिष्ठान महोत्सव जैन कुंभ मेळा आयोजन समितीने याबाबतीत कामांच्या यादीचा सुधारित प्रस्ताव सादर करावा अशा सूचना त्यांनी केल्या. स्थायी कामांमध्ये पर्यटनाच्या अनुषंगाने जी कामे करता येतील ते देखील पहावे. यावेळी आमदार राहुल आहेर व जैन अल्पसंख्याक वित्त मंडळाचे अध्यक्ष ललीत गांधी यासह महोत्सव समितीच्या सदस्यांनी या महोत्सवासाठी तसेच मंदिर परिसर विकासासाठीचे सादरीकरण केले.
