इंडिया दर्पण ऑनलाईन डेस्क
सांगली जिल्ह्यातील उबाठा गटाचे पदाधिकारी डबल महाराष्ट्र केसरी पैलवान चंद्रहार पाटील यांनी शेकडो कार्यकर्त्यांसह सोमवारी शिवसेना पक्षात जाहीर प्रवेश केला. यावेळी त्यांचे आणि त्यांच्या सर्व सहकाऱ्यांचे उपमुख्यमंत्री एकनाथ शिंदे यांनी स्वागत केले. आपण आता नकली आखाड्यातून खऱ्या आखाड्यात उतरलो आहोत, असे सांगत त्यांनी प्रवेश केला.
पैलवान चंद्रहार पाटील यांच्यासोबत सातारा जिल्ह्यातील पहिला हिंद केसरी संतोष आबा वेताळ, पैलवान विकास पाटील, सायगावचे उरसरपंच सागर वंजारी, सुरलीचे उपसरपंच कृष्णात भादणे, अमोल घोगे, सुशांत जाधव, संजय कांबळे, लक्ष्मण मंडळे यासह शेकडो कार्यकर्त्यांनी आज शिवसेनेमध्ये पक्षप्रवेश केला.
यावेळी उद्योग मंत्री उदय सामंत, आमदार सुहास बाबर, शिवसेना सचिव राम रेपाळे, शिवसेना सचिव संजय मोरे, शिवसेना प्रवक्ते राहुल लोंढे, माजी नगरसेवक एकनाथ भोईर, दिपाली सय्यद तसेच शिवसेना पदाधिकारी आणि शिवसैनिक उपस्थित होते.
यावेळी उपमुख्यमंत्री एकनाथ शिंदे यांनी म्हटले की, तीन वर्षांपूर्वी उठाव झाल्यानंतर माझ्यावर दररोज आरोप झाले, पण मुख्यमंत्री असताना आरोपाला प्रत्यारोपाने नाही, तर कामातून उत्तर दिले. त्यामुळेच महाराष्ट्रातील जनतेने या कामांना ऐतिहासिक प्रतिसाद दिला आणि महायुतीच्या २३२ जागा निवडून आल्या. ही शिवसेना वंदनीय हिंदुहृदयसम्राट बाळासाहेबांची शिवसेना आहे, टोमणेसम्राटांची नाही असे याप्रसंगी निक्षून सांगितले.
पैलवान चंद्रहार पाटील हे आता कुटील माणसाकडून स्वच्छ मनाच्या माणसाकडे आले आहेत. चंद्रहार पाटील यांनी मराठी मातीचा खेळ असलेल्या कुस्तीला लौकिक मिळवून दिला. पैलवान हे महाराष्ट्राचे वैभव आहे. मी जरी पैलवान नसलो तरी २०२२ मध्ये समोरच्या लोकांना चारीमुंड्या चीत केले आहे. तेव्हा असे डावपेच टाकले की ते अद्याप उठले नाहीत. पैलवानांना डावपेच माहित असतात. कुस्तीला बळ देण्यासाठी त्याला राजकीय पाठिंबा आवश्यक आहे. चंद्रहार पाटील यांचा आखाडा मंत्री उदय सामंत यांनी बघितला आहे. चंद्रहार पाटील यांचा संकल्प पूर्ण करण्याची जबाबदारी आता शिवसेनेची आहे असे यावेळी आवर्जून नमूद केले. सीमेवरील जवानांसाठी दिल्लीत रक्तदान शिबीर घेण्याचा संकल्प चंद्रहार पाटील यांनी केलाय. त्यांची देशभक्ती पाहता दिल्लीत काय काश्मीरमध्ये रक्तदान शिबीर घेऊ असेही याप्रसंगी जाहीर केले.
