चाळीसगाव – अवजड वाहनांसाठी बंद असलेल्या कन्नड घाटात महाराष्ट्र पोलीस ट्रक चालकांकडून कशा प्रकारे पैसे वसुली करतात याचा व्हिडीओ काही दिवसांपूर्वी व्हायरल झाला होता. याची खातरजमा करण्यासाठी आमदार मंगेश चव्हाण यांनी वेषांतर करत स्टिंग ऑपरेशन केले. त्यांनी स्वतः अजवड ट्रक चालवत कन्नड घाटात नेला. आणि गैरकारभाराचा मोठा पर्दाफाश केला.
कन्नड घाटात असलेल्या पोलिसांनी ट्रक ड्रायव्हर बनलेल्या आमदार चव्हाण त्यांच्याकडे ५०० रुपयांची मागणी केली. थोडे पैसे कमी करा, अशी विनंती चव्हाण यांनी केली. मात्र, पोलिस नाही म्हणाले. त्यानंतर चव्हाण यांनी ५०० रुपयांची नोट पोलिसाच्या हातात दिली. बाकी पैसे परत मागितले असता सदर पोलिसाने ते देण्यास नकार दिला. नंतर ड्रायव्हर बनलेले आमदार मंगेश चव्हाण यांनी बाजूला उभ्या असलेल्या पोलिसांना जवळ बोलावले व हा बाकी पैसे परत देत नसल्याचे सांगितले. तेव्हा त्यातील एक पोलीस शिवीगाळ करायला लागला, मग आमदार मंगेश चव्हाण यांनी खाली उतरून पोलिसांशी बोलायला सुरुवात करताच काही पोलिसांनी आमदारांना ओळखले व त्यांनी पळ काढला.
याप्रकारानंतर आमदार चव्हाण म्हणाले की, सचिन वाझे जेलमध्ये गेल्याने १०० कोटींचे टार्गेट पूर्ण करण्यासाठी ठिकठिकाणी अशी वसुली महाविकास आघाडी सरकारकडून सुरु आहे. एकीकडे चाळीसगाव तालुक्यात शेतकऱ्यांची गुरे चोरीला जात असताना तिथे बंदोबस्त करायला पोलिसांना वेळ नाही. महावसुली आघाडी शेतकऱ्यांचे वीज कनेक्शन तोडत आहेत. १५ दिवसांपासून सुरु असलेल्या एसटी संपाकडे कानाडोळा करतात. मात्र पोलिसांच्या मार्फत महावसुली जोरात सुरु आहे, असा आरोप चव्हाण यांनी केला आहे.
व्हिडीओ व्हायरल
दुरुस्तीसाठी अवजड वाहनांना प्रवेश बंद असलेल्या कन्नड घाटात पोलिसांकडून ५०० ते १००० रुपये प्रति अवजड वाहन घेऊन त्यांना सोडण्यात येते. यामुळे अनेकदा घाट जाम होऊन ५ ते १० तास घाट जाम होतो. गंभीर रुग्ण घेऊन जाणाऱ्या एम्ब्युलन्स तासंतास अडकून पडतात. यामुळे अनेक अडचणींना अनेकांना तोंड द्यावे लागत आहे. याची दखल घेऊनच आमदार चव्हाण यांनी स्टिंग ऑपरेशन केले. त्याचा व्हिडिओ आता व्हायरल झाला आहे.
बघा या स्टिंग ऑपरेशनचा व्हिडिओ
https://www.facebook.com/103446941470343/posts/377123274102707/
