मोठा दिलासा! कोरोना उपचार खर्चाबाबत केंद्र सरकारची मोठी घोषणा

विशेष प्रतिनिधी, नवी दिल्ली

कोरोनाविरोधात लढा देताना सामान्य लोकांना दिलासा देण्यासाठी केंद्र सरकारने काही महत्त्वाचे निर्णय घेतले आहेत. कोरोनाच्या उपचारात खर्च झालेल्या पैशांमध्ये कोणताही कर लावला जाणार नाही. तसेच रुग्णाच्या मृत्यूनंतर मिळणार्या आर्थिक मदतीवर कोणताही कर लावण्यात येणार नाही, अशी घोषणा केंद्रीय अर्थराज्य मंत्री अनुराग ठाकूर यांनी केली आहे. पॅन-आधार लिंक करण्याची मर्यादाही वाढविण्याची घोषणा त्यांनी केली.

कोविड उपचारासाठी कंपनी किंवा कोणत्याही व्यक्तीकडून घेतलेल्या रकमेवर कोणताही कर लागणार नाही. २०१९०-२० आणि २०२१-२२ या आर्थिक वर्षासाठी ही सवलत मिळणार आहे. करासंबंधित कागदपत्रांच्या कंप्लायन्सची मुदतही वाढविण्यात आली आहे. महामारीमुळे अनेक लोकांच्या नोकर्या गेल्या आहेत. अशा लोकांना कोविडशीही लढा द्यावा लागत आहे. त्यामुळे सरकारकडून त्यांना कर सवलत देण्यात येत आहे.

जर कोणतीही कंपनी कोविडमुळे मृत्यू झालेल्या व्यक्तीच्या कुटुंबीयांना  Ex-Gratia Payment करत असेल त्यांना रकमेवर करामधून दिलासा मिळणार आहे. ही सवलत कोणत्याही व्यक्तीकडून आपला मित्र, नातेवाईक किंवा दुसऱ्याच्या मदतीसाठी देिल्या गेलेल्या  Ex-Gratia Payment वर ही सवलत मिळणार आहे. १० लाखांपर्यंतच्या रकमेवर ही सवलत मिळेल, असे श्री. ठाकूर यांनी स्पष्ट केले आहे.

घर खरेदीवरही करात सवलतीची मर्यादा वाढविण्यात आली आहे. या प्रकरणात ३ महिन्यांसाठी कर कपातीची मर्यादा वाढविण्यात आली आहे. म्हणजेच ३० सप्टेंबरपर्यंत मालमत्ता खरेदी करू शकणाऱ्या इच्छुक ग्राहकांना सवलत मिळणार आहे.