दिलासा! CBSE ने १० वी आणि १२ वीच्या विद्यार्थ्यांसाठी घेतला हा मोठा निर्णय

विशेष प्रतिनिधी, नवी दिल्ली

कोरोनामुळे एकूणच शिक्षण व्यवस्थेला चांगला फटका बसला आहे. केवळ विद्यार्थ्यांचेच नव्हे तर शिक्षण व्यवस्थेचे सुद्धा मोठे नुकसान झाले आहे. शाळांचे वर्ग आणि परीक्षांच्या बाबतीत शिक्षण मंडळांना वेळोवेळी निर्णय बदलावेच लागले आहेत. आता तर दहावी आणि बारावीच्या सिलॅबसबाबतही एक महत्त्वाचा निर्णय सीबीएसईने घेतला आहे. त्याचा विद्यार्थ्यांवर कसा परिणाम होतो हे भविष्यातच कळणार आहे.

कोरोना संक्रमणामुळे सीबीएसईने पुन्हा एकदा दहावी आणि बारावीच्या २०२१-२२ च्या सत्रासाठी सिलॅबसला कात्री लावली आहे. यासंदर्भात आता सीबीएसईच्या वतीने एक नवीन योजना आखली जात आहे. गेल्यावर्षीप्रमाणे या सत्रावरही कोरोनाचा चांगलाच परिणाम झाला आहे.

एप्रिलपासून ऑनलाईन वर्ग सुरू आहेत. अश्यात सिलॅबस कमी होण्याचे संकेत पुन्हा एकदा मंडळाने दिले आहेत. २०२० मध्ये शाळा बंद असल्याने सिलॅबस पूर्ण होऊ शकला नाही. त्यामुळे सिलॅबसला ३० टक्के कात्री लावण्यात आली होती. दहावी-बारावीच्या विद्यार्थ्यांनाही ऐनवेळी सिलॅबस कमी झाल्यामुळे मोठी कसरत करावी लागली होती. मात्र परीक्षा झाली नाही, त्यामुळे त्याने फारसा फरक पडला नाही. आता मात्र शाळा ऑनलाईन सुरू झाल्यामुळे त्याचे किमान नियोजन करणे शक्य होणार आहे.

नववी ते ११ वी मध्येही ३० टक्के सिलॅबस कमी करण्यात आला होता. पण कमी झालेला सिलॅबस २०२२ च्या परीक्षांसाठी लागू करेल, अशी शक्यता आहे. लवकरच याची माहिती शाळांना देण्यात येणार आहे, असे मंडळाच्या एका वरीष्ठ अधिकाऱ्याने सांगितले. सध्या ऑनलाईन वर्ग सुरू असले तरीही अनेक शाळांकडून याला प्रतिसाद मिळत नाही, त्यामुळे सिलॅबस पूर्ण राहिला तर विद्यार्थ्यांचे नुकसान होईल. हे ध्यानात ठेवून सिलॅबस कमी करण्याचा निर्णय झालेला आहे, असेही या अधिकाऱ्याने सांगितले.

३० टक्के सिलॅबस गायब

बहुतांश शाळांमध्ये गेल्या वर्षीचा अनुभव लक्षात घेऊन आधीपासूनच ३० टक्के सिलॅबस सोडून वर्ग घेतले जात आहेत. नववी ते बारावी पर्यंतचा सिलॅबस कमी झालेला आहे. नववी आणि अकरावीच्या विद्यार्थ्यांना पुन्हा एकदा प्रमोट करून पुढच्या वर्गात टाकलेले आहे. त्यामुळे ३० टक्के सिलॅबसवरच अभ्यास घेतला जात आहे.