नाशिक (इंडिया दर्पण वृत्तसेवा) – आदिवासी विकास विभागातील एक्झिक्युटिव्ह इंजिनिअरला तब्बल २८ लाखांची लाच घेताना रंगेहाथ पकडण्यात आल्याचे प्रकरण ताजे असतानाच आता आणखी एक धक्कादायक वृत्त समोर आले आहे. केंद्रीय अन्वेषण ब्युरो अर्थात सीबीआयनेही नाशिकमध्ये मोठी कारवाई केल्याचे वृत्त आहे. खास म्हणजे, सीबीआयच्या जाळ्यात केंद्रीय जीएसटी कार्यालयातील सुप्रिटेंडंट चंद्रकांत चव्हाणके हा गळाला लागला आहे. नाशिकमध्ये सीबीआयने कार्यालय सुरू केले आहे. या कार्यालयाची ही पहिलीच आणि अतिशय मोठी कारवाई आहे.
नाशिकमध्ये गेल्या काही दिवसांपासून सातत्याने लाचखोरीच्या घटना घडत आहेत. राज्य सरकारच्या लाचलुचपत प्रतिबंधक विभागाने (एसीबी) दोन सापळे रचले होते. त्यात एक सापळा दिंडोरी तहसिल कार्यालयात होता. तेथील मंडळ अधिकाऱ्याला १० हजाराची लाच घेताना पकडले आहे. तर, नाशकात आदिवासी विकास विभागाचा एक्झिक्युटिव्ह इंजिनिअर दिनेशकुमार बागुल सापडला आहे. २ कोटी रुपयांच्या कामासाठी तब्बल १२ टक्के या लाच बागुलने मागितली. त्यापोटी तब्बल २८ लाख रुपये त्याने त्याच्याच घरी कंत्राटदाराकडून घेतले. आणि तो सापळ्यात अडकला. बागुलकडे मोठी माया असल्याचे वृत्त असतानाच आता सीबीआयनेही नाशकात मोठी कारवाई केली आहे.
सीबीआयच्या वरिष्ठ सूत्रांनी इंडिया दर्पणला दिलेल्या माहितीनुसार, नाशिकमध्ये वस्तू व सेवा कर (जीएसटी) विभागाचे दोन कार्यालय आहेत. यातील एक राज्य सरकारचे आहे तर दुसरे केंद्र सरकारचे. यातील केंद्र सरकारच्या सीजीएसटी कार्यालयावर सीबीआयने धाड टाकली. या कारवाईमध्ये सीजीएसटी विभागाचा सुप्रिटेंडंट चंद्रकांत चव्हाणके हा सीबीआयच्या हाती लागला आहे. हे कार्यालय सिडकोतील अंबड लिंक रोड येथे आहे. चव्हाणके लाच मागत असल्याबाबत तक्रारी सीबीआयकडे प्राप्त झाली. जीएसटी कर चोरी संदर्भातील शहानिशा आणि प्रकरणांची हाताळणीचे काम चव्हाणके करतो. यातीलच एका कर चोरी प्रकरणात चव्हाणकेने लाच मागितली होती. आणि याच प्रकरणाची तक्रार सीबीआयकडे आली. त्यानंतर सीबीआयने सापळा रचला. चव्हाणकेवर अतिशय बारकाईन लक्ष ठेवले. ही पाळत अतिशय अचूक असल्यानेच तो सीबीआयच्या जाळ्यात सापडला आहे.
दरम्यान,, लाचेचा आकडा मोठा असल्याचे सांगितले जात आहे. यासंदर्भात सीबीआयकडून आज सायंकाळीच सविस्तर माहिती दिली जाणार आहे.
CBI Raid in Nashik CGST Superintendent Bribe Trap
