इंडिया दर्पण ऑनलाईन डेस्क
ठाकरे गटाने हकालपट्टी केलेले सुधाकर बडगुजर यांच्यावर १७ गुन्हे दाखल आहे. ज्यांचे संबध दाऊदचा हस्तक सलीम कुत्ताबरोबर आहेत अशा बडगुजर यांना पक्षात घेऊन नये अशी मागणी भाजपच्या आमदार सीमा हिरे यांनी केली. त्याला एक दिवस उलटत नाही तोच भाजप प्रदेशाध्यक्ष चंद्रशेखर बावनकुळे यांनी बडगुजर यांना पक्षाची दारे उघडे करुन दिली. आज नाशिकमध्ये ते आले असता त्यांनी सांगितले की, सुधाकर बडगुजर यांच्या पक्ष प्रवेशाबाबत गिरीश महाजन लक्ष घालत आहे. पक्ष वाढीसाठी सर्वांना दार खुले आहे. असे सांगत त्यांनी बडगुजर यांच्या पक्षप्रवेशाचे संकेत दिले. यावेळी त्यांनी स्थानिक पदाधिका-यांचा विरोध आहे. त्याबाबत चर्चा केली जाईल असे सांगून बडगुजर यांच्यावर झालेल्या आरोपाबाबतही वक्तव्य केले. ते म्हणाले की फक्त आरोप आहे. ते सिध्द झाले नाही.
काल आमदार हिरे यांनी बडगुजर हे भाजपमध्ये येण्यासाठी इच्छुक आहेत असे बातम्यांमधून कळाले. आमच्यामध्ये असा कोणताही विषय नाही. चर्चा नाही. मी बडगुजर यांच्या विरोधात दोन वेळा निवडणूक लढले आहे. आमच्या कार्यकर्त्यांना बजगुजर यांनी त्रास दिला. आमच्या नेत्यांवर त्यांनी आक्षेपार्ह टीका केली. चंद्रशेखर बावनकुळे यांच्या बाबतींत चुकीची बातमी दिली. तसेच नारायण राणे यांना भरल्या ताटावरुन त्यांनी अटक करायला लावली. अशा व्यक्तीला पक्षात घेऊ नये अशी मागणी आम्ही वरीष्ठांकडे केल्याचे सांगितले होते.
सुधाकर बडगुजर यांच्यावर १७ गुन्हे दाखल आहे. त्यांचा मुलगा एका गोळीबार प्रकरणी अडकला होता. या सर्वांमध्ये कारवाई होऊ नये म्हणून ते भाजपमध्ये येत असतील असे आमदार सीमा हिरे यांनी सांगितले. बडगुजर हे मनपाच्या प्रत्येक टेंडरमध्ये सहभागी आहेत. ते ज्या पक्षात होते त्यांच्यामुळे अनेकांनी पक्ष सोडला. त्यामुळे अशा लोकांना आमच्या पक्षात प्रवेश दिला जाणार नाही. आमचे वरिष्ठ असा निर्णय घेणार नाहीत, बडगुजर यांची प्रतिमा मलिन आहे. त्यांना किती मते मिळाली त्यामुळे त्यांना घेतांना पक्षनेते दहा वेळा विचार करतील असेही त्यांनी सांगितले. पण, एक दिवस उलटत नाही तोच बडगुजर यांना भाजपने दार उघडे केले.
शिवसेना शिंदे गटाचाही विरोध
सुधाकर बडगुजर यांच्यावर मुंबई बाँम्बस्फोटातील दहशतवादी सलीम कुत्ताशी संबंध असल्याचे आरोप आहेत. स्व. हिंदूहृदय सम्राट बाळासाहेब ठाकरे आज हयात असते तर त्यांनीही बडगुजर यांना शिवसेनेत ठेवलेच नसते. त्यामुळे, त्यांना शिवसेनेत प्रवेश देण्यास सर्व शिवसैनिकांचा विरोधच राहील असे शिवसेना शिंदे गटाचे महानगरप्रमुख प्रविण (बंटी) तिदमे यांनी सांगितले.
ते म्हणाले की, सुधाकर बडगुजर यांनी महायुती विरोधात गरळ ओकली होती. कुंभमेळा लक्षात घेऊन ठेकेदारी साठीच त्यांना सत्तेत सहभाग हवा असल्याचे आरोपही प्रसिद्ध झाले आहेत. शिवसेनेत जनसामान्यांना सोबत घेऊन वाटचाल करणे वंदनीय बाळासाहेबांना आणि धर्मवीर आनंद दिघे साहेबांना अपेक्षित होते. त्यांच्या शिकवणीतून शिवसेनेचा झेंडा घेऊन सामाजिक कार्यात उतरणाऱ्यांना शिवसेनेची दारे नेहमीच उघडी आहेत. मात्र, बाळासाहेबांच्या विचारांशी प्रतारणा करणाऱ्यांना शिवसेनेत प्रवेश देण्यास शिवसैनिकांचा विरोधच राहील असे तिदमे यांनी सांगितले.
