नाशिक (इंडिया दर्पण वृत्तसेवा) – दिंडोरी लोकसभा मतदार संघाचे भाजपचे माजी खासदार हरिश्चंद्र चव्हाण यांचे आज सकाळी निधन झाले. गेल्या काही दिवसांपासून त्यांचे प्रकृत्ती बरी नव्हती. त्यांच्या पश्चात पत्नी कलावती चव्हाण, एक मुलगा व मुलगी असा परिवार आहे. त्यांचे पार्थिव नाशिक येथे अंत्यदर्शनासाठी पाटील लेन क्रं.४ कॉलेज रोड या त्यांच्या निवासस्थानी ठेवण्यात आलेले आहे.
हरिश्चंद्र चव्हाण यांनी २००९ आणि २०१४ च्या लोकसभा निवडणुकीवेळी दिंडोरी लोकसभा मतदार संघातून विजय मिळवला होता. २०१४ मध्ये त्यांनी भारती पवार यांचा २ लाख ४७ हजार मतांनी पराभव केला होता. भारती पवार त्यावेळी राष्ट्रवादीकडून लढल्या होत्या. २०१९ मध्ये भारती पवार भाजपमध्ये आल्या. त्यानंतर भाजपाने चव्हाण यांना उमेदवारी नाकारुन भारती पवार यांना उमेदवारी दिली होती.
चव्हाण यांनी पंचायत समिती, जिल्हा परिषद येथेही पदे भूषवली. शांत व मनमिळाऊ स्वभावामुळे ते लोकप्रिय होते.
