विरोधी पक्षनेते देवेंद्र फडणवीस यांनी महाविकास आघाडीवर परखड टीका
मुंबई – मुंबई येथे आयोजित भारतीय जनता पार्टी महाराष्ट्र प्रदेश कार्यसमितीच्या बैठकीच्या समारोप सत्राला माजी मुख्यमंत्री आणि विधानसभेतील विरोधी पक्षनेते देवेंद्र फडणवीस यांनी महाविकास आघाडीवर परखड टीका केली. यावेळी त्यांनी महाराष्ट्राची आजची परिस्थिती जी आहे, त्याला सरकार म्हणता येईल का ? असा सवाल करत मंत्री झाले एकेक विभागाचे राजे अन् प्रत्येक विभागात एकेक वाझे, असे सांगितले.
यावेळी ते म्हणाले की, कोविडमध्ये उत्तम काम केले अशी पाठ थोपटली जाते, तेव्हा प्रश्न निर्माण होतो, तुमचे डोके ठिकाणावर आहे का? सर्वाधिक रुग्ण, सर्वाधिक मृत्यू महाराष्ट्रात आहेत. .. हे तर मृत्यूच्या सापळ्याचे मॉडेल असल्याचेही त्यांनी सांगितले. मुंबईच्या बाहेर महाराष्ट्र आहे का ? असा प्रश्न करत त्यांनी
नागपूर, नाशिक, औरंगाबाद, पुणे महाराष्ट्रात आहे का ? असा प्रश्न निर्माण करणारे यांचे काम असल्याचे त्यांनी सांगितले. एकतरी जंबो कोविड सेंटर मुंबईच्या बाहेर उघडले का ? असेही ते म्हणाले.
विविध विभागातील वाझेंचा पत्ता आमच्याकडे आलेला आहे. तो आम्हाला सांगता येऊ नये म्हणून अधिवेशन दोन दिवसांचे ठेवल्याचा आरोपही त्यांनी केला. ओबीसी आरक्षणाबाबत बोलतांना ते म्हणाले की, यावेळी केवळ आणि केवळ या सरकारच्या नाकर्तेपणामुळे ओबीसी आरक्षण रद्द झाले. केंद्राकडे डेटाची मागणी ही ५० टक्क्यांच्या वरचे आरक्षण टिकविण्यासाठी. पण महाविकास आघाडी सरकारला ५० टक्क्याच्या खालचे आरक्षण टिकविता आले नाही. १५ महिने राज्य मागासवर्ग आयोग तयारच केला नाही. केवळ न्यायालयात तारखा मागत राहिले. त्यामुळे ५० टक्क्याच्या आतले सुद्धा ओबीसी आरक्षण रद्द होण्याचे पाप हे केवळ आणि केवळ महाविकास आघाडी सरकारचे आहे. या आरक्षणासाठी जनगणनेची नाही तर एम्पिरीकल डेटाची गरज. या सरकारला ओबीसींना राजकीय आरक्षण द्यायचेच नाही. जमत नसेल तर आम्हाला सांगा. केवळ इच्छाशक्ती असावी लागते. भाजपा २६ तारखेचे आंदोलन करून शांत बसणार नाही. ओबीसी आरक्षण पूर्ववत होत नाही तोवर शांत बसणार नाही. त्यासाठी कुठल्याही स्तराला जाऊ. पुढची कारवाई न करता आताच केंद्र सरकारकडे जाणे म्हणजे मुलगा झालेला नसताना त्याचे नाव ठेवण्यासारखे आहे. फक्त केंद्र सरकारकडे बोट दाखवून राजकारण करणे, हे एकमेव काम! सकाळपासून रात्रीपर्यंत फक्त खोटे बोलणे, या सरकारचे एवढे एकच काम,या सरकारने विधिमंडळ बंद केले. या सरकारने लोकशाहीची दारं बंद करून टाकली असतील, पण लोकशाही पुनर्स्थापित कशी करायची हे आम्हाला ठावूक असल्याचेही ते म्हणाले.
