नवी दिल्ली (इंडिया दर्पण वृत्तसेवा) – सीएनजी-पीएनजीच्या आणि घरगुती वापराच्या सिलींडरच्या सातत्याने वाढत्या किंमती ग्राहकांसाठी डोकेदुखी ठरत आहेत. मात्र आता केंद्र सरकारच्या नव्या फॉर्म्युल्यामुळे पाईपलाईनद्वारे पुरविल्या जाणाऱ्या गॅसच्या किंमती घटण्याची शक्यता आहे. पंतप्रधानांच्या अध्यक्षतेत झालेल्या मंत्रीमंडळाच्या बैठकीत पारीख समितीच्या शिफारशींना मंजुरी देण्यात आली आहे.
नवीन फॉर्म्युलामध्ये दोन वर्षांसाठी कमाल मर्यादा कायम राहणार आहे. त्यानंतर प्रति ब्रिटिश थर्मल युनिट ०.२५ डॉलरची वार्षिक वाढ होईल. सीएनजी-पीएनजीचे दर आता दर महिन्याला निश्चित होतील. सध्या दर सहा महिन्यांनी दर निश्चित केले जातात. गॅस उत्पादनाला प्रोत्साहन देण्यासाठी अतिरिक्त उत्पादनावर २० टक्के प्रीमियम देण्याचा प्रस्ताव आहे.
विद्यमान उत्पादकांनी गॅस उत्पादन वाढविल्यास घोषित किमतीव्यतिरिक्त त्यांना २० टक्के प्रीमियमच्या स्वरूपात प्रोत्साहन दिले जाईल. यामुळे उत्पादकांना नवीन तंत्रज्ञानाचा वापर करून उत्पादन वाढविण्यास प्रोत्साहन मिळेल, असा विश्वास केंद्र सरकारला आहे. पारीख समितीनेही गॅस जीएसटीच्या कक्षेत आणण्याची शिफारस केली आहे. यामध्ये गॅसवर तीन टक्के ते २४ टक्के असा सर्वसाधारण कर लावण्याची शिफारस करण्यात आली आहे. यामुळे गॅस मार्केटला चालना मिळण्यास मदत होण्याची शक्यता आहे.
दहा टक्क्यांनी किंमती घटणार!
नव्या फॉर्म्युल्यामुळे सीएनजी-पीएनजीच्या किंमती दहा टक्क्यांनी कमी होण्याची शक्यता आहे. यामागचे गणीत केंद्रीय मंत्री अनुराग ठाकूर यांनी स्पष्ट केले आहे. ‘पारंपरिक क्षेत्रातून तयार होणारा नैसर्गिक वायू आता अमेरिका-रशियाप्रमाणे कच्च्या तेलाच्या किमतींशी जोडला जाणार आहे. यापूर्वी गॅसच्या किंमतींच्या आधारे दर निश्चित व्हायचे.
आता एपीएम गॅसची किंमत भारतीय बास्केटमधील कच्च्या तेलाच्या किंमतींच्या १० टक्के असेल. ही किंमत प्रति दशलक्ष ब्रिटिश थर्मल युनिट ६.५ डॉलरपेक्षा जास्त असणार नाही. मूळ किंमत ४ युनिट प्रति डॉलर ठेवण्यात आली आहे. सध्याची गॅस किंमत ८.५७ डॉलर आहे.
दिल्लीत दर घटणार
नव्या फॉर्म्युल्यामुळे दिल्लीत ६ रुपयांनी आणि मेरठमध्ये ८ रुपयांनी गॅसच्या किंमती कमी होतील. या निर्णयामुळे दिल्लीतील सीएनजी आणि पीएनजीच्या किमती ६ रुपयांपर्यंत कमी होऊ शकतात. सध्या दिल्लीत सीएनजी ७९.५६ रुपये प्रति किलो आणि पीएनजी ५३.५९ रुपये प्रति हजार क्युबिक मीटर आहे.
https://twitter.com/drharshvardhan/status/1644053724099387392?s=20
Big Relief CNG PNG rates Will Reduced
