इंडिया दर्पण ऑनलाईन डेस्क
नागपूर येथे झालेल्या मंत्रिमंडळ विस्तारात राष्ट्रवादीचे जेष्ठ नेते छगन भुजबळ यांना डावलल्यामुळे त्यांच्या समर्थकांमध्ये प्रचंड संताप आहे. आज या सर्व पार्श्वभूमीवर छगन भुजबळ यांनी जहां नही चैना वहां नही…असे म्हणत नाराजी व्यक्त करुन अजितदादांची साथ सोडण्याचे संकेत दिले आहे. त्याचप्रमाणे त्यांनी नागपूर अधिवेशनात न थांबण्याचाही निर्णय घेतला असून दुखावलेले भुजबळ नाशिकला येणार आहे. गुरुवारी ते सकाळी ९.३० वाजता भुजबळ फार्म कार्यालयात पदाधिकारी व कार्यकर्त्यांच्या भेटी घेणार आहे.
यावेळी मंत्रिमंडळात नाव का आलं नाही. यावर बोलतांना ते म्हणाले की, ७-८ दिवसांपूर्वी मला राज्यसभेवर पाठवण्याचे प्रपोजल पक्षाकडून दिले होते. पण, मी हा प्रस्ताव नाकारला. कारण मला राज्यसभेवर जायचं नाही. मागच्यावेळी मी म्हणालो होतो. तेव्हा ते ठिक होते. पण, मी आताच निवडून आलो. लगेच राज्यसभेवर जाणं मला मान्य नाही. कारण मी आता राजीनामा दिला तर माझ्या मतदारांशी तो विश्वासघात ठरेल. माझे मतदार रागवणार नाहीत. पण, त्यांच्याशी मी प्रतारणा करु शकत नाही. असेही त्यांनी सांगितले.
याअगोदर त्यांची पहिली प्रतिक्रिया दिली होती. त्यावेळी ते म्हणाले मी सामान्य कार्यकर्ता आहे. मला डावलले काय आणि फेकले काय ? काय फरक पडतो. मंत्रिपद किती वेळा आले आणि किती वेळा गेले भुजबळ कधी संपले नाही असे सांगत त्यांनी हो मी नाराज असल्याचे सांगितले. अजित पवारांसोबत चर्चा केली नाही, मला ते गरजेचे वाटले नाही असेही त्यांनी सांगितले. यावेळी ते म्हणाले की, मला का घेतलं नाही ते त्यांना विचारा. मी मतदार संघातील कार्यकर्त्यांबरोबर चर्चा करुन निर्णय घेईल असेही ते म्हणाले.
तर दुसरीकडे मंत्रिमंडळात स्थान न दिल्यामुळे राज्यात ठिकठिकाणी आंदोलन सुरु झाली आहे. नाशिक जिल्ह्यात छत्रपती संभाजी नगर – नाशिक राज्य मार्गावर विंचूर येथे आज रास्ता रोको करण्यात आला. यावेळी समर्थकांनी जोरदार घोषणाबाजी केली. अर्धा तास रास्ता रोको आंदोलन करण्यात आल्यामुळे वाहतूक कोंडी झाली. महामार्गावर लांबच लांब रांगा लागल्या. भुजबळांना योग्य सन्मान न दिल्यास यापेक्षा तीव्र आंदोलन करण्यात येईल अशा इशारा यावेळी देण्यात आला. कालही नाशिक येथे राष्ट्रवादी काँग्रेस कार्यालयासमोर भुजबळ समर्थकांनी टायर जाळत निषेध व्यक्त केला. भुजबळांना मंत्रिमंडळात का घेतले नाही याचे स्पष्टीकरण अद्यापही राष्ट्रवादीकडून स्पष्ट करण्यात आले नाही. त्यामुळे ही खदखद वाढत असून त्यामुळे ठिकठिकाणी भुजबळ समर्थक आंदोलनाच्या पवित्र्यात आहे.
