इंडिया दर्पण ऑनलाईन डेस्क
बीडच्या खंडणी प्रकरणातील मुख्य आरोपी वाल्मिक कराडला केज न्यायालयाने १४ दिवसांची पोलिस कोठडी सुनावली. काल रात्री उशीरा त्याला न्यायालयात आणण्यात आले. यानंतर झालेल्या युक्तीवादानंतर न्यायालयाने कोठडीचा निर्णय दिला. कराड पुण्यात मंगळवारी सीआयडीसमोर शरण आला. तीन आठवड्यांपासून तो फरार होता. सीआयडीकडून आता त्याची कसून चौकशी सुरु केली आहे. सरपंच संतोष देशमुख हत्या होऊन २३ दिवस उलटले आहे. या प्रकरणातही वाल्मिक कराड यांचे नाव घेतले जात आहे. त्यामुळे या प्रकरणातही त्याची चौकशी केली जाणार आहे.
रात्री उशीरा केज कोर्टात कराडला हजर केल्यानंतर कोर्ट परिसरात त्याचे समर्थक आणि विरोधकांनी एकच गर्दी केली होती. पोलिसांचा तगडा बंदोबस्त होता. दोन्ही बाजूंनी जोरदार युक्तीवाद करण्यात आला. मुख्य आरोपी सुदर्शन घुले हा फरार आहे. त्याचा ठावठिकाणा माहिती करायचा आहे. कराड आणि घुले यांच्यात काय संभाषण झाले. दोघांमध्ये काय संबध आहेत. घुले हा कराडच्या सांगण्यावरुन खंडणी व इतर कामे करत होता का. याचा तपास करायचा असल्याने कराडच्या कोठडीची विनंती सीआयडीकडून करण्यात आली. त्यानंतर कोर्टाने १४ दिवसांची पोलिस कोठडी सुनावली.
मी जर दोषी असेल तर मला फाशी द्यावी
शरण येण्याअगोदर वाल्मिक कराड यांनी व्हिडिओ शेअर करत संतोष देशमुख हत्या प्रकरणाशी संबध नसल्याचा दावा केला आहे. मला अटकपूर्वचा अधिकार असताना मी सीआयडीसमोर हजर होत आहे. संतोष देशमुख यांच्या मारेक-यांना अटक करावी, फाशी द्यावी राजकीय कारणासाठी माझं नाव घेऊ नये. या प्रकरणात मी जर दोषी असेल तर मला फाशी द्यावी असेही त्याने या व्हिडिओत म्हटले आहे.
हत्या प्रकरणातील मास्टरमाइंड
वाल्मिक कराड हा संतोष देशमुख हत्या प्रकरणातील मास्टरमाइंड असल्याचे आरोप विरोधकांकडून केला जात आहे. त्याच्या विरोधात हत्येचा गुन्हा दाखल करावा अशी मागणी करण्यात आलेली आहे. त्यामुळे सीआयडी वाल्मिक कराड याच्यावर हत्येचा गुन्हा दाखल करते का हे चौकशीनंतर स्पष्ट होणार आहे.
