बीड (इंडिया दर्पण वृत्तसेवा) – गेल्या काही दिवसांमध्ये मराठवाड्यातील छत्रपती संभाजी नगर, जालना, बीड ,नांदेड सारख्या शहर आणि जिल्ह्यातील काही भागांमध्ये महिलांवरील अत्याचाराची घटनांमध्ये मोठी वाढ झाली आहे. बीडमध्ये एक धक्कादायक प्रकार घडला आहे. धावत्या कारमध्ये एका महिलेवर तिच्या प्रियकरासह तिघांनी लैंगिक अत्याचार केल्याचे समोर आले आहे. याप्रकरणी बीडच्या शिवाजीनगर पोलीस ठाण्यात प्रियकरासह अन्य दोघांवर गुन्हा दाखल करण्यात आला आहे.
महिलेवर उपचार सुरू
बीड शहरातील शिवाजीनगर परिसरात राहणाऱ्या एका २६ वर्षीय महिलेच्या पतीचे कोरोनात निधन झाले. यानंतर गेल्या वर्षभरापासून त्या महिलेचे एका व्यक्तीबरोबर प्रेमाचे संबंध होते. तसेच वर्षभरापासून हे दोघेही एकत्र राहत होते. मात्र पीडित महिला रस्त्यावरून येत असताना एका कारमध्ये तिच्या प्रियकराने व त्याच्यासोबत असलेल्या दोघांनी महिलेस कारमध्ये बळजबरीने बसवून भरधाव वेगाने कार मांजरसुब्याच्या दिशेने नेली. बीड ते मांजरसुंबा या दरम्यान प्रियकरासोबत असणाऱ्या दोन नराधमांनी महिलेला मारहाण करत तिच्यावर अतिप्रसंग केला. यानंतर वाटेत प्रियकराच्या पत्नीने सुद्धा पीडित महिलेला मारहाण केली. यामध्ये पिडीत महिला जखमी झाली असून महिलेवर जिल्हा रुग्णालयामध्ये उपचार सुरू आहे. पीडितेच्या तक्रारीवरून प्रियकरासह अन्य दोघे व एका महिलेवर गुन्हा नोंद दाखल करण्यात आला आहे.
भडगावच्या प्रकाराचा सर्वत्र निषेध
जळगाव जिल्ह्यातील भडगाव तालुक्यात असलेल्या गोंडगाव येथे आठ वर्षीय बालिकेवर अत्याचार करून तिची हत्या केल्याचा धक्कादायक प्रकार समोर आला आहे. यानंतर संपूर्ण राज्यभरात संतापाची लाट उसळली आहे. अत्याचार करणाऱ्या नराधमास फाशीची शिक्षा देण्यात यावी,त्यासाठी जलदगती न्यायालयात हा खटला चालविण्यात यावा,अशी मागणी होत आहे. तसेच ज्येष्ठ वकिलांची नियुक्ती करण्यात यावी आणि मुलीच्या कुटुंबीयांना तातडीने आर्थिक मदत शासनाने करावी, या मागणीसाठी सर्व पक्षाच्या कार्यकर्त्यांनी शासनाचे लक्ष वेधून घेण्यासाठी बंदचे आवाहन केले होते, या बंदला चांगला प्रतिसाद लाभला.
beed crime women sexual abuse in car
