इंडिया दर्पण ऑनलाईन डेस्क – क्रिकेट हा खेळ केवळ भारतीय नव्हे तर जगभरातील अनेक नागरिकांचा आवडता खेळ आहे सहाजिकच राष्ट्रीय असो की आंतरराष्ट्रीय क्रिकेट क्रिकेट स्पर्धांमध्ये नेहमीच रंगतदार सामने होतात. विशेषतः भारत आणि पाकिस्तान हे पारंपारिक प्रतिस्पर्धी जेव्हा एकमेकांसमोर येतात तेव्हा सामना कोण जिंकणार याची सर्वांनाच उत्सुकता असते.
आता अशिया कप स्पर्धा रंगणार असून यातही भारत-पाकिस्तान यांचा सामना कोण जिंकणार ?याची सर्वांनाच उत्सुकता लागून आहे आशियाई क्रिकेट परिषदेने आशिया चषक 2022 च्या तारखा जाहीर केल्या आहेत. युएई या स्पर्धेचे यजमानपद भूषवणार आहे. स्पर्धेतील पहिला सामना दि. 27 ऑगस्ट रोजी होणार असून अंतिम सामना दि. 11 सप्टेंबर रोजी होणार आहे. आशियाई क्रिकेट परिषदेने ट्विट करून स्पर्धेच्या तारखांची माहिती दिली आहे. ही स्पर्धा टी-20 फॉरमॅटमध्ये खेळवली जाईल. या स्पर्धेत भारत आणि पाकिस्तान यांच्यातही सामना पाहायला मिळणार आहे. टीम इंडिया हा आशिया कपच्या इतिहासातील सर्वात यशस्वी संघ आहे.
आशिया चषक स्पर्धेतील भारत-पाकिस्तान सामन्याला मोठी डिमांड आहे. इंडिया विरुद्ध पाकिस्तान सामन्यातील तिकीटांचा काळाबाजार होत असल्याचे समोर आले आहे आणि एक तिकिट लाखाच्या घरात ब्लॅकने विकले जात आहे. रोहित शर्माच्या नेतृत्वाखाली भारतीय संघ आशिया चषक जिंकण्यासाठी सज्ज झाला असून २० ऑगस्टला यूएईसाठी संघ रवाना होईल.
सन १९८४ मध्ये सुरू झालेली ही स्पर्धा २०१४पर्यंत ५० षटकांच्या फॉरमॅटमध्ये खेळवली गेली. २०१६मध्ये ट्वेंटी-२० वर्ल्ड कप स्पर्धेच्या पार्श्वभूमीवर आशिया चषकही ट्वेंटी-२०त खेळवण्यात आला होता. तेव्हा महेंद्रसिंग धोनीच्या नेतृत्वाखाली भारताने जेतेपद पटकावले होते.
सन २०१८मध्ये पुन्हा वन डे फॉरमॅटमध्ये आशिया चषक झाला आणि तेव्हाही भारताने बाजी मारली. आतापर्यंत झालेल्या १३ पर्वांत भारताने सर्वाधिक ७ जेतेपदं पटकावली आहेत. पाच जेतेपदांसह श्रीलंका दुसऱ्या आणि दोन विजयासह पाकिस्तान तिसऱ्या क्रमांकावर आहे.
भारत-पाकिस्तान सामन्याची हाईप असताना BCCI अध्यक्ष सौरव गांगुली यांनी भारतीय संघाला मोलाचा सल्ला दिला आहे. गांगुली म्हणाले की, मी या स्पर्धेकडे फक्त आशिया चषक म्हणून पाहत आहे, मी त्याकडे इंडिया विरुद्ध पाकिस्तान असे पाहत नाही. भारतीय संघानेही तेच करावे, अशी माझी इच्छा आहे. मी जेव्हा क्रिकेट खेळायचो, तेव्हा माझ्यासाठी पाकिस्तानविरुद्धची लढत ही अन्य लढतींप्रमाणेच होती. मी नेहमी स्पर्धा जिंकण्याचा विचार करायचो. आताचा संघ तगडा आहे आणि त्यांनी नुकत्याच पार पडलेल्या मालिकांमध्ये दमदार कामगिरी करून दाखवली आहे.
आशिया चषक स्पर्धेतही त्यांच्याकडून अशीच कामगिरी होईल, अशी मला खात्री आहे. दि.२८ ऑगस्टला भारत-पाकिस्तान यांच्यात अ गटातील पहिला सामना होणार आहे. यानंतर सुपर ४ मध्ये उभय संघ एकमेकांसमोर येण्याची दाट शक्यता आहे आणि दोन्ही संघांचा फॉर्म पाहता फायनल त्यांच्यात झाली तर सामना अधिकच रंगतदार होईल आणि त्याची जगभरात चर्चा होईल हे निश्चित.
Asia Cup 2022 India Vs Pakistan Cricket Match
BCCI Sourav Ganguly
