आषाढीसाठी विठुरायाच्या दर्शनासाठी लागू होणार हा पॅटर्न?

विशेष प्रतिनिधी, पुणे 

अवघ्या महाराष्ट्राचे लाडके दैवत असलेल्या विठुरायाच्या म्हणजेच पंढरपूरच्या श्री विठ्ठल रुक्मिणी मातेच्या दर्शनाची आस सर्व वारकऱ्यांना लागली आहे. आषाढी वारी तथा आषाढी एकादशी यात्रा अवघ्या २० ते २५ दिवसांवर येऊन ठेपली आहे. मात्र, यंदाही मागील वर्षाप्रमाणेच वारकऱ्यांना विठुरायाचे प्रत्यक्ष दर्शन कोरोना संसर्गामुळे घेता येणार नाही तसेच वारीलाही जाता येणार नाही. त्यामुळे वारकरी संप्रदायामध्ये नाराजीचे वातावरण आहे. शासनाच्या आदेशानुसार कोरोना नियमांचे पालन करीत केवळ मानाच्या पालख्या आणि मोजक्याच वारकऱ्यांना यंदा दर्शन घेणे शक्य आहे. परंतु श्री शेत्र शेगाव येथील देवस्थानच्या नियमाप्रमाणे कार्य केल्यास सर्व वारकऱ्यांना पंढरपूरच्या विठुरायाचे दर्शन घेणे शक्य होणार आहे. कोरोनामुळे महाराष्ट्रातील सर्वच देवस्थान बंद आहेत. मात्र आता भाविकांना  पंढरपूर येथील पांडुरंगाच्या दर्शनाची ओढ लागली आहे. आषाढी वारीमध्ये भाविकांची गर्दी होऊ नये आणि गर्दी झाली तर कोरोनाचा प्रादुर्भाव वाढू शकतो. त्यामुळे सरकारने पंढरपूरचे मंदिर देखील बंद ठेवले आहे.

      पंढरपूर विठ्ठल रुक्मिणी मंदिर समिती व राज्य सरकारने ठरविले तर संपूर्ण महिनाभरात सुमारे ९०  हजार भाविक दर्शन घेऊ शकतील, असे मत वारकरी संप्रदायातील पदाधिकाऱ्यांनी व्यक्त केले आहे. कोरोना संकट काळात देवदर्शनासाठी शेगाव येथील श्री गजानन महाराज संस्थानने राबविलेला दर्शन पॅटर्न श्री क्षेत्र पंढरपूरच्या आषाढ वारीत देखील राबविल्यास हजारो भाविक दर्शन घेवू शकतील. त्यामुळे ऑनलाइन नोंदणी करून दर्शनाची व्यवस्था करण्याचा पॅटर्न पंढरपुरात राबविण्याची मागणी वारकऱ्यांनी राज्य शासनाकडे केली आहे.

एकीकडे मानाच्या पालखीसोबत चाळीस वारकऱ्यांनाच परवानगी देण्याचे आदेश विभागीय आयुक्त सौरभ राव यांनी दिले आहेत. कोरोनाच्या पार्श्वभूमीवर यंदा आषाढी वारीवर निर्बंध लादण्यात आले आहेत. त्यामुळे पायी वारीला मनाई करण्यात आली आहे. तसेच आषाढी एकादशीच्या आसपास पंढरपुरात संचारबंदी लागू केली जाण्याची शक्यता आहे. पोलिसांनी तसे पत्र जिल्हाधिकाऱ्यांना पाठवले आहे. तर दुसरीकडे शेगाव येथील गजानन महाराज संस्थानमध्ये एका दिवसात तीन हजार भाविकांना कोरोनाचे सर्व नियम पाळून दर्शन दिल्या जात होते आणि ही प्रक्रिया सर्व ऑनलाईन असल्यामुळे ज्या भाविकांचा दर्शनाचा नंबर आहे तो भाविक त्या तारखेला ठराविक वेळेवर तिथे उपस्थित राहत होता. त्यामुळे पंढरपूर विठ्ठल रुक्मिणी समितीने शेगाव पॅटर्न राबवून भाविकांना दर्शन द्यायचं ठरविल्यास ३० दिवसांमध्ये ९० हजार भाविक कुठल्याही प्रकारचा गोंधळ न होता कोरोनाचे सर्व नियम पाळून दर्शन घेऊ शकतात.

      दोन वर्षापासून पंढरपूर येथील विठ्ठल रुक्मिणी मंदिर बंद असल्यामुळे देवस्थानला फार मोठी आर्थिक झळ पोहोचलेली आहे. भाविक दररोज पांडुरंगाच्या दर्शनाला येत राहिले तर विठ्ठल रुक्मिणी देवस्थानला आर्थिक स्वरुपात फार मोठी मदत होऊ शकेल. तसेच या नियोजनाने पंढरपूरमध्ये गर्दी होणार नाही आणि दररोज तीन हजार भाविक जर पंढरपूरमध्ये दर्शनाला आले तर स्थानिक छोटे – मोठे व्यावसायिक व विक्रेते यांनाही उपजीविकेचे साधन प्राप्त होईल.

मात्र त्याचबरोबर जे भाविक पंढरपूरमध्ये येतील, त्यांच्याजवळ कोरोना चाचणीचा निगेटिव्ह अहवाल असेल त्यांनाच प्रवेश दयावा, असे मत विश्व वारकरी सेनेचे संस्थापक अध्यक्ष गणेश महाराज शेटे आणि अन्य पदाधिकाऱ्यांनी व्यक्त केली आहे.