नाशिक – अँटी करप्शन ब्युरो (एसीबी)ने रचलेल्या सापळ्यात ग्रामसेवक गळाला लागला आहे. ग्रामपंचायत निमगाव मड येथील ग्रामसेवक महेश रमेश महाले यास तब्बल २० हजार रुपयांची लाच घेताना रंगेहाथ पकडण्यात आले आहे. स्मशानभूमीच्या कामकाचे बील मंजूर करण्यासाठी आणि भरलेली अनामत रक्कम परत करण्यासाठी महाले याने तब्बल ८० हजार रुपयांची लाच मागितली होती. तडजोडी अंती ही रक्कम २० हजार रुपये करण्यात आली. तक्रारदाराने त्वरीत एसीबीशी संपर्क साधला. त्यानंतर एसीबीने सापळा रचला. त्यानुसार ग्रामसेवक कार्यालयात महाले हा २० हजार रुपये घेताना रंगेहाथ पकडले गेला. त्यामुळे एसीबीने येवला पोलिस स्टेशनमध्ये महाले विरुद्ध गुन्हा दाखल केला आहे. याप्रकरणी अधिक तपास सुरू आहे.
