इंडिया दर्पण ऑनलाईन डेस्क
बीड जिल्हा नियोजन समितीच्या निधी वाटपात दुजाभाव झाल्याचा आरोप विरोधकांकडून मंत्री धनजंय मुंडे यांच्यावर करण्यात आला होता. याबाबत पालकमंत्री तथा उपमुख्यमंत्री अजित पवार यांनी तीन सदस्यीय चौकशी पथक समिती गठीत करुन एका आठवड्यात अहवाल सादर करण्याचे आदेश दिले आहेत.
अजित पवार यांच्या या निर्णयानंतर सामाजिक कार्यकर्त्या अंजली दमानिया यांनी सोशल मीडियावर पोस्ट टाकत म्हटले आहे की, पालकमंत्री अजित पवार यांच्या घोषणेचे स्वागत! २०२३-२४ आणि २४-२५ च्या जिल्हा नियोजन समिती प्रशासकीय मान्यतेची होणार चौकशी होणार आहे. तीन सदस्यीय चौकशी पथक समिती गठीत करण्यात आली असून एका आठवड्यात अहवाल देणार आहे.
पुढे या पोस्टमध्ये म्हटले आहे की, बीड जिल्हा नियेाजन समितीच्या निधी वाटपात दुजाभाव झाला… या कामांमध्ये गैरप्रकार झाल्याचा आरोप विरोधकांकडून करण्यात आला होता… याबाबत पालकमंत्री तथा उपमुख्यमंत्री अजित पवार हे अ‍ॅक्शन मोडमध्ये आल्याचे दिसत आहे.. नियोजन समितीची बैठक होताच आता २०२३-२४ आणि २४-२५ सालच्या जिल्हा वार्षिक योजना अंतर्गत प्रशासकीय मान्यता दिलेल्या कामांची सर्वकष चौकशी करण्यासाठी विशेष चौकशी पथक गठीत करण्यात आले आहे. यामध्ये धाराशिवचे उपजिल्हाधिकारी संतोष भोर हे अध्यक्ष असतील तर अर्थ आणि सांख्यिकी संचलनालय अपर संचालक म.का. भांगे व जालना जिल्हा नियोजन अधिकारी सुनिल सुर्यवंशी यांचा या चौकशी पथकात समावेश आहे.
हे पथक मंजूर झालेल्या कामांची सद्यस्थिती, त्या कामांना दिलेली तांत्रिक मान्यता आणि कार्यारंभ आदेश तसेच प्रशासकीय मान्यता दिलेली कामे, त्याकरिता निधी वितरण याची चौकशी करुन एका आठवड्यात हा अहवाल सादर करावा असे आदेश राज्याचे अवर सचिव सुषमा कांबळी यांनी दिले आहेत.
