नाशिक (इंडिया दर्पण वृत्तसेवा)– एकीकडे शिवसेना ठाकरे गटातून मोठ्या प्रमाणात आऊटगोईंग सुरु असतांना निफाडचे माजी आमदार अनिल कदम यांनी ठाकरे कुटुंबियांवरील आपली निष्ठा व्यक्त करत भावनिक संदेश सोशल मीडियावर पोस्ट केला आहे. काल शिवसेनेचा वर्धापनदिन होता. त्या पार्श्वभूीवर त्यांनी हा संदेश पोस्ट केला आहे.
कदम यांनी म्हटले आहे की, ग्रामपंचायत सदस्य ते विधानसभा सदस्य हा माझा प्रवास शिवसेनेमुळेच आहे. अनिल कदम हा ब्रँड झाला तो केवळ शिवसेना, ठाकरे कुटुंबिय आणि तमाम शिवसैनिकांमुळेच! मी बाळासाहेब, उद्धव ठाकरे आणि ठाकरे कुटुंबीयांपुढे सदैव नतमस्तक असेल.शिवसेना – एक विचार, एक संस्कार, एक जीवनमार्ग आहे.
लहानपणापासून माझ्या अंतःकरणात खोलवर रुजलेलं नाव म्हणजे शिवसेना. हा केवळ पक्ष नाही, ही आहे मराठी अस्मितेची चळवळ, हिंदुत्वाचा अभिमान,
आणि महाराष्ट्राच्या गौरवशाली इतिहासाचा एक ज्वलंत अध्याय. शिवसेना प्रमुख बाळासाहेब ठाकरे यांचं तेजस्वी नेतृत्व, त्यांची प्रखर वक्तृत्वशैली,
त्यांनी घडवलेला कार्यकर्ता, आणि त्यांचा महाराष्ट्रभर ते काश्मीरपासून कन्याकुमारीपर्यंत आणि जगभरातील मराठी मनांवर उमटलेला प्रभाव — हे सगळं आजही जिवंत आहे.
५९ वर्षांचा प्रवास हा नुसता वेळ नाही, तर तो आहे लाखो शिवसैनिकांच्या घामाचा, त्यागाचा, निष्ठेचा आणि अभिमानाचा दस्तऐवज. आज शिवसेनेवर जे अघटित झाले, ते दुःखद आणि असह्य आहे. ही फक्त फाटाफुटी नाही,तर एका वैभवशाली विचारधारेवर झालेला आघात आहे. काय झालं, कुणी केलं, का केलं – हे प्रश्न आजही अनेक मनात खदखदत आहेत.
पण मी एक सांगतो –शिवसेना ही केवळ संघटना नव्हती, ती आमचं आयुष्य होती. आणि बाळासाहेब हे केवळ नेते नव्हते, ते आमचे देव होते.
आज मी जे काही आहे –ग्रामपंचायतीपासून जिल्हा परिषद सदस्य, सभापती आणि दोन वेळा आमदार (MLA) या सगळ्या पदांवर मी पोहोचलो,
ते केवळ आणि केवळ शिवसेनेमुळे, बाळासाहेब ठाकरे यांच्यामुळे आणि उद्धवसाहेब ठाकरे व त्यांच्या कुटुंबियांच्या आशीर्वादामुळेच.
आज माझं नाव अनिल कदम जर कुठे “ब्रँड” म्हणून ओळखलं जात असेल, तर तो सारा मान मी बाळासाहेब ठाकरे, शिवसेना आणि ठाकरे कुटुंबियांना देतो.
मी मनापासून नतमस्तक होतो उद्धवसाहेब ठाकरे आणि त्यांच्या संपूर्ण कुटुंबियांपुढे. निफाड तालुक्यातील प्रत्येक शिवसैनिक, मतदार आणि माझ्यावर प्रेम करणाऱ्या प्रत्येक कार्यकर्त्याचं मी मनःपूर्वक आभार मानतो. आजही माझ्या मनात फक्त आणि फक्त शिवसेना प्रमुख बाळासाहेब ठाकरे यांचा आशीर्वाद आहे, आणि तोच माझा श्वास आहे,माझं बळ आहे.
