इंडिया दर्पण ऑनलाईन डेस्क – बिग बॉसचे १६ वे पर्व नुकतेच संपले. सगळ्यांचे अंदाज चुकवत एमसी स्टॅनने विजेतेपद पटकावले. संभाव्य विजेता म्हणून ज्याच्या नावाची चर्चा होती तो अमरावतीचा शिव ठाकरे उपविजेता ठरला.
अमरावतीत परतल्यानंतर शिवचे जंगी स्वागत करण्यात आले. बिग बॉसनंतर मला ओळख मिळाली. ती टिकवण्यासाठी आता मला जास्त मेहनत घ्यावी लागणार आहे. ओळख निर्माण कठीण असले तरी ती टिकवून ठेवणे हे त्यापेक्षाही मोठे असते, असे शिव म्हणतो. मोाठे स्वप्न असेल तर मेहनतही तेवढीच घ्यावी लागते. सलमान खानने दिलेल्या ऑफरबाबतही तो बोलला आहे.
बिग बॉस झाल्यानंतर त्यातील परफॉर्मन्स पाहून सलमान खानकडून कामासाठी काही ऑफर मिळाली का, असा प्रश्न शिव ठाकरेला विचारण्यात आला. याचे उत्तर देताना शिव सांगतो, “मी बिग बॉसमध्ये खूप मनापासून काम केले आहे. सलमान खानने ऑफर दिली की नाही, याबद्दल मला माहीत नाही. पण बिग बॉसमधील माझ्या परफॉर्मन्सचे मात्र त्यांनी कौतुक केले. या कार्यक्रमामुळे मला मोठमोठ्या लोकांशी बोलता आले, मोठ्या सर्कलमध्ये जाता आले, त्यामुळे मी खूश आहे. सर्वांना आता शिव ठाकरे कोण आहे, हे कळले आहे.
अमरावतीतील मुलगा सलमान खानसोबत बसेल, सलमान खान त्याला ओळखेल असे कोणालाच वाटले नव्हते. पण हे प्रत्यक्षात उतरले आहे. बिग बॉसनंतर एक पार्टी झाली. या पार्टीमध्ये मला सलमान खानने सांगितले की, तुला मराठीमध्ये मोठे प्रोजेक्ट मिळतील. हिंदीतही मिळतील. माझ्यासाठी ही खूप मोठी गोष्ट आहे,” असे शिव ठाकरेने सांगितले.
“आता मला खूप मेहनत करावी लागेल. जेवढे स्वप्न मोठे तेवढीच जास्त मेहनत करावी लागेल. माझी स्वप्न पूर्ण करण्यासाठी सतत झटणे, लोकांच्या प्रेमाचा आदर करत त्यांच्या अपेक्षा पूर्ण करणे अत्यंत आवश्यक आहे. आता माझा प्रवास सुरू झालेला आहे,” असेही शिव ठाकरे म्हणाला.
बिग बॉसमधील सर्व स्पर्धकांसाठी फराह खानने पार्टीचे आयोजन केले होते. या पार्टीमध्ये शिव ठाकरेही सामील झाला होता. पार्टीमध्ये शिव ठाकरेने चांगलीच धमाल केली. पार्टीमधील एक व्हिडीओ व्हायरल झाला असून यामध्ये तो अर्चाना गौतमसोबत डान्स करताना दिसत आहे. अर्चनानेच तिच्या इन्स्टाग्राम अकाऊंटवरुन शिवबरोबर डान्स करतानाचा हा व्हिडीओ शेअर केला आहे.
Amravati Shiv Thakare Salman Khan Offer
Big Boss 16
