Amazon Prime वरील हे दोन हटके चित्रपट नक्की बघा…

हटके चित्रपटांची मेजवानी

राज्यात सध्या मिनी लॉकडाऊन सुरू असल्याने सध्या अनेक जण घरातच आहेत. अशातच एक चांगली संधी आहे. ती म्हणजे अॅमेझॉन प्राईमवरील दोन हटके चित्रपट पाहण्याची. कोणते आहेत ते चित्रपट आणि कशासाठी बघायचे…

The Last Colour and The Great Indian Kitchen.
पुन्हा लॉकडाऊन सुरु झालं मग हातात रिमोट घेऊन जरा निवांत बसून काहीतरी छान बघू या असा विचार केला तर Amazon Prime वर हे दोन सिनेमे दिसले. तसेही सध्याच्या काळात ओटीटी प्लॅटफॉर्म म्हणजे वाळवंटातील ओअ‍ॅसिस  ! छोटे असल्या कारणाने एका दिवसात दोन बघून झाले.

तर पहिला The last colour हा सुप्रसिध्द इंडियन आणि अमेरिकन शेफ विकास खन्ना यांच्या the last colour या कादंबरीवर आधारित आणि त्यांनीच दिग्दर्शीत केलेला हा चित्रपट सुरु होतो वाराणसीच्या गंगेच्या घाटावर. एक नऊ वर्षांची छोटी नावाची चुणचुणीत मुलीची ही गोष्ट आहे. जी घाटावर पणत्या विकते,  दोन काठ्यांना बांधलेल्या दोरावर चालते.

तीला शाळेत जायचंय, खूप शिकायचंय आणि त्यासाठी तीला ३०० रुपये जमवायचेत. यासाठी तीला मदत करत असतो तिच्याच वयाचा चिंटू.अशातच एक दिवस छोटीला घाटावर भेटते नूर. नूर विधवा असते आणि ती पण घाटावरील  एका विधवा आश्रमात  राहत असते. नूर आणि छोटीची छान गट्टी जमते. नेहमी श्वेत साडी घालणाऱ्या नूरला छोटी विचारते तुझा आवडता रंग कोणता, नूर सांगते गुलाबी जयपूरच्या राजघराण्यातल्या स्त्रिया परिधान करतात तो गुलाबी.

आयुष्याचे सगळे रंग उडालेल्या नूरला छोटी म्हणते, “ इस होलीपे आप पर गुलाबी रंग पडेगा, ये वादा रहा हमारा आपसे.” करते छोटी तिचा वादा पूर्ण ? खूप  शिकण्याचं तिचं स्वप्न, काय होतं त्याचं ? या सगळ्या प्रश्नांच्या उत्तरा साठी चित्रपट बघायलाच हवा. वाराणसीचे घाट तर असेही सुंदर आहेत. पण चित्रपटात खूपच सुंदर वाटतात. नूरच्या भूमिकेत नीना गुप्ता एकदम परफेक्ट पण Aqsa Siddiqui ने उभी केलेली छोटी मनात घर करते. तिचा निरागस चेहरा, संवाद  म्हणण्याची शैली आणि एकूणच तिचा पडद्यावरचा वावर अप्रतिम. आवर्जून बघावा असा the last colour.

—-

The great Indian Kitchen

दुसरा चित्रपट The great Indian Kitchen. हा चित्रपट मी शीर्षक जरा हटके वाटलं म्हणून बघीलता. या चित्रपटाचा ऑडिओ mallyalam आहे. इंग्लिशमध्ये sub titles वाचूनच पिक्चर बघावा लागतो. चित्रपटाचे शीर्षक गीत खूपच सुंदर आहे. या चित्रपटाचे कथानकही वेगळ्या धाटणीचे आहे. एका मुलीची ही कहाणी आहे. सुंदर असलेल्या या मुलीचे डोळे हरणासारखे तर केस लांब आहेत. अशीच सुंदर मुलगी, उत्तम नृत्य करणारी  लग्नं होऊन केरळ मधील एका कर्मठ सनातन कुटुंबात प्रवेश करते. आणि सुरु होतो the great indian kitchen.

सकाळी उठल्यापासून तर रात्री अंथरुणात पडेपर्यंत अखंड कामात. अंगण झाडणे, कपडे धुणे, फरशी पुसणे, नाश्ता, जेवण. काय करत नाही ही सुंदर मुलगी ? नवरा आणि सासरा यांनी खाऊन डायनिंग टेबल वर केलेला पसारा आवरते. दिवसभर खुर्चीत बसलेल्या सासऱ्याच्या हातात ब्रश पेस्ट देते. त्यांना मिक्सर वर वाटलेली चटणी आवडत नाही, म्हणून पाट्यावर चटणी वाटते. कुकरचा भात आवडत नाही म्हणून चुलीवर भात शिजवते. वॉशिंग मशिनचे कपडे आवडत नाही म्हणून हाताने कपडे धुते.

तुंबलेल्या सिंक मधून हाताने कचरा काढते. अनेकदा सांगूनही नवरा plumber बोलवत नाही मग सिंक खाली बादली, गोण्या ठेवते, नाकाला बोट लावून ते घाण पाणी फेकते. एवढंच नाही त्या चार दिवसात जमिनीवर झोपणं, थंड पाण्याची आंघोळ पण तेव्हाच तिच्या हातात पुस्तक दिसतं, मोबाईल दिसतो. हे अस नरक यातनानी भरलेले आयुष्य जगणं ती मान्य करते की बंड करते? सगळे बंध झुगारून होते मुक्त? नृत्याच्या ठेक्यावर थिरकतात  तिची पावलं पुन्हा?

या सगळ्या प्रश्नांच्या उत्तरासाठी पाहायलाच हवा the great indian kitchen, Joe Baby या mallyalam फिल्म डायरेक्टरचा हा चित्रपट आहे . काय अफलातून पिक्चर आहे. सर्व स्त्रियांनी तर बघितलाच  पाहिजे. पण 8 मार्चला Happy womens day असं हसतमुखाने म्हणणाऱ्या आणि ही सगळी कामं बायकांचीच असतात, त्यांनी ती केलीच पाहिजे अशी मानसिकता असणाऱ्या तमाम पुरुषांनीही आवर्जून हा चित्रपट बघायला हवा….