इंडिया दर्पण ऑनलाईन डेस्क – सध्या देशभरात उष्णतेची लाट असून उन्हाच्या तडाख्याने सर्व नागरिक हैराण झाले आहेत. त्यातच लग्न समारंभाचा देखील मोसम आहे आणि मुस्लीम समाजाचा रमजान महिना सुरू असून रोजे म्हणजे उपवास सुरू आहेत. याच काळात उन्हापासून बचाव करण्यासाठी प्रत्येक जण थंडगार फळे आणि सरबताचा उपयोग करत असतो.
मात्र फळांचे भाव मोठ्या प्रमाणावर वाढले आहेत सर्व सरबतासाठी लागणारे लिंबू प्रति नग दहा रुपये झाले आहेत. त्यातच एका लग्न समारंभात नवरदेवाला त्याच्या मित्रांनी चक्क लिंबू भेट दिले आहेत. यापूर्वी दक्षिणेत एका लग्न समारंभात नवरदेवाला पेट्रोल भेट मिळाले होते. तर आता गुजरातमध्ये नवरदेवाला लिंबू भेट मिळाल्याने त्याची सर्वत्र चर्चा सुरू आहे.
देशात लिंबाच्या भावात प्रचंड वाढ झाली आहे. त्याची किंमत इतकी वाढली की ती कमी होण्याचे नाव घेत नाही. आता लग्नात वराला लिंबू भेट म्हणून दिले जात आहे. गुजरातमधील राजकोटमध्ये लग्न समारंभात नागरिकांनी वराला लिंबू भेट दिले. वराचा एक मित्र म्हणाला, “सध्या राज्यात आणि देशात लिंबाच्या किमती खूप वाढल्या आहेत. या हंगामात लिंबांची खूप गरज आहे. म्हणूनच मी लिंबू सादर केले आहेत.”
वास्तविक, मुस्लिम समाजाचा पवित्र रमजान महिना सुरू आहे. उपवास करणाऱ्यांसाठी रमजानचा महिना खूप कठीण असतो. पण उपवास केल्यानंतर उपवास करणारे संध्याकाळी इफ्तारसाठी म्हणजे उपवास सोडण्यासाठी बसतात, तेव्हा त्यांना मोठा दिलासा मिळतो. मात्र फळांच्या गगनाला भिडलेल्या किमतीमुळे रोजे करणाऱ्यांचे हाल होत आहेत.
अनेक शहरात लिंबू चक्क 10 रुपयाला एक विकला जात आहे. त्यामुळे उपवास करणाऱ्यांना लिंबू सरबत मिळणेही कठीण झाले आहे. उपवासाचा मुद्दा बाजूला ठेवू या. परंतु महिन्यात सामान्य नागरिक उष्णतेपासून वाचण्यासाठी फळांचा वापर करतात, जेणेकरून त्यांची ऊर्जा टिकून राहते. मात्र सर्वांनाच फळे खरेदी करणे अवघड झाले आहे.
एक रोजे धारक म्हणाले की, यंदा फळांच्या भावाने सर्व विक्रम मोडले आहेत. विशेषत: लिंबू महागड्या दरात विकले जात आहेत, त्यामुळे उपवास करणे कठीण होत आहे. रोजामुळे उपवास करणाऱ्याला अशक्तपणा जाणवतो, तो टाळण्यासाठी त्याला चांगली फळे आणि लिंबाचा रस प्यावा लागतो. पण या सर्व गोष्टी खूप महाग झाल्या आहेत.
