मनीष कुलकर्णी, इंडिया दर्पण वृत्तसेवा
केंद्र सरकारने गेल्या काही दिवसांपासून फास्ट टॅग अनिवार्य केले आहे. महामार्गांवरील टोल नाक्यावर लागणाऱ्या लांब रांगांवर फास्ट टॅगचा तोडगा काढण्यात आला आहे. या सुविधेमुळे वाहनधारकांचा वेळ वाचतोच, शिवाय टोल भरणेदेखील अधिक सोपे होते. फास्टटॅगद्वारे तुम्ही मोबाईल रिचार्ज करू शकता, ही त्यातील जमेची बाजू म्हणता येईल. परंतु तंत्रज्ञानावर आधारित या सुविधांचा वापर वाढत असताना तुम्हाला अनेक गोष्टी काळजीपूर्वक करणे खूप आवश्यक आहे. ऑनलाइन फसवणुकीच्या अनेक घटना घडत असताना थोडा निष्काळजीपणा तुम्हाला खूप महागात पडू शकतो.
पेटीएम किंवा गुगल पे यासारख्या अॅपच्या माध्यमातून तुम्ही फास्टटॅग रिचार्ज करत असाल, तर त्यापूर्वी तुम्हाला तुमच्या वाहनाचा क्रमांक द्यावा लागेल. जर चुकूनही चुकीचा क्रमांक नोंदवला तर तुमच्या बँक खात्यातून पैसे कपात होईल, पण तुमचे रिचार्जही होणार नाही.
फास्ट टॅग रिचार्ज करण्यापूर्वी तुमच्याकडे कोणत्या बँकेचा फास्टटॅग आहे हे जाणून घेणे आवश्यक आहे. हे जाणून घेतल्याशिवाय रिचार्ज करणे अशक्य आहे. चुकीच्या बँक खात्याचा तपशील नोंदवला तर पैसे कपात होईल पण तुमचे रिचार्ज होणार नाही.
हा तपशील भरल्यानंतर तुम्हाला ग्राहकांचा तपशील भरावा लागेल. त्यामध्ये किती रक्कम भरायची आहे हे नोंदवावे. तुमच्या गरजेनुसार रक्कम भरावी. सगळ्यात शेवटच्या पेजवर पेमेंट होईल. पेमेंटच्या पेजवर अनेक पर्याय दिसतील. त्यामध्ये डेबिट कार्ड आणि यूपीआयचा पर्याय दिसून येईल. तुम्ही हवा तो पर्याय निवडू शकता. पेमेंट फास्टटॅगमध्ये येण्यासाठी काही वेळ लागू शकतो.
फास्टटॅगशी संबंधित कोणतीही समस्या जसे रिचार्ज होत नसेल किंवा जास्त पैसे कपात होत असेल तर तुम्ही एनएचआय च्या हेल्पलाइन क्रमांक १०३३ वर बोलू शकता. फास्टटॅगशी संबंधित तक्रारी नोंदविण्यासाठी ही हेल्पलाइन बनविण्यात आली आहे.
