नवी दिल्ली (इंडिया दर्पण वृत्तसेवा) – कोणत्याही शासकीय किंवा खासगी कार्यालयातील किंवा कंपनीमधील एक प्रसिद्ध संवाद म्हणजे ‘माझी ड्युटी संपली मी चाललो… ‘ असे म्हणत अनेक जण काम अर्धवट टाकून निघून जातात. त्यामुळे सर्वांचेच मोठे नुकसान होते. परंतु एका पायलटने असे उद्गार काढल्यास विमान प्रवाशांचे काय हाल झाले असतील, हे सांगणे कठीण ठरते. परंतु प्रत्यक्षात असे घडले आहे.
५ तास विमान उभेच..
दिर्घ प्रतिक्षेनंतर रविवार, दि.२५ जून रोजी दिल्ली-मुंबईसह देशातल्या बहुतांश भागात पावसाने हजेरी लावली. मात्र पाऊस आणि खराब हवामानामुळे रविवारी अनेक विमानांची उड्डाणे उशिराने झाली तर काही ठिकाणी विमानांचे इमर्जन्सी लँडिंग करावे लागले. दिल्ली विमानतळावरून विमानांची उड्डाणं करण्यात आणि आलेली विमाने उतरवण्यात खूप अडचणी येत होत्या. आंतरराष्ट्रीय आणि देशांतर्गत विमानांच्या लँडिंग आणि टेक ऑफमध्ये अडचणी येत होत्या. याचदरम्यान, लंडनहून दिल्लीला येणारे एअर इंडियाचे एक विमान (एआय-११२ ) खराब हवामानामुळे दिल्लीत उतरवता आले नाही. अशा परिस्थितीत हे विमान जयपूरच्या दिशेने वळवण्यात आले. या काळात परदेशातून दिल्लीला येणारी, तसेच अनेक देशांतर्गत विमाने जयपूरला डायव्हर्ट करण्यात आली. दोन तासांनी हवामान सुधारलं. त्यानंतर दिल्ली विमानतळ प्रशासनाने क्लिअरन्स दिला. लँडिंग क्लिअरन्स मिळाल्यानंतर जयपूरला उतरवण्यात आलेली विमाने एक एक करत दिल्लीच्या दिशेने रवाना करण्यात आली. परंतु लंडनहून दिल्लीला येणारे विमान तीन तास झाले तरी दिल्लीच्या दिशेने रवाना झाले नाही. कारण पायलटने या विमानाचे उड्डाण करण्यास नकार दिला. माझी ड्युटी संपली आहे, असे म्हणत त्याने विमान उडवण्यास नकार दिला. एवढे बोलून हा पायलट विमानातून उतरला. पायलटच्या या निर्णयामुळे सकाळी ४ वाजता दिल्लीला पोहचणारे विमान ५ तास उलटले तरी जयपूर विमानतळावरच उभे होते. अखेर विमानात बसलेले अनेक प्रवासी वैतागले.
नियमांचे काटेकोर पालन
दिर्घ विमान उभे असल्यामुळे विमानातील ३५० प्रवाशांपैकी काही प्रवाशांना बसने दिल्लीला पाठवण्यात आले. त्यानंतर विमान दिल्लीला पोहोचवण्यासाठी दुसऱ्या क्रू मेंबर्सची व्यवस्था करण्यात आली. उरलेल्या प्रवशांना घेऊन काही तासांनी विमान जयपूरहून दिल्लीला आले. दरम्यान, एअर इंडियाने त्यांच्या अधिकृत निवेदनाद्वारे सांगितले की, खराब हवामानामुळे आणि खराब दृष्यमानतेमुळे हे विमान जयपूरला डायव्हर्ट करण्यात आले. हवामान सुधारण्यास खूप वेळ लागला. त्यादरम्यान कॉकपिट चालक दलाचा ड्युटी डाईम लिमिटेशन अवधी संपला होता. अर्थात पायलट किती वेळ विमान चालवू शकतो याची एक मर्यादा असते. हा पायलट लंडनहून विमान घेऊन आला होता. त्यानंतर काही तास तो जयपूरमध्ये वाट पाहत होता. नियामक प्राधिकरणांनी निर्धारित केलेल्या एफडीटीएलअंतर्गत आल्यानंतर पायलट विमान चालवू शकत नाहीत. एअर इंडिया कंपनी त्यांचे प्रवाशी आणि पायलटसह क्रू मेंबर्सच्या सुरक्षिततेला सर्वाधिक प्राधान्य देते. तसेच विमान संचालनाच्या सर्व नियमांचे आम्ही काटेकोरपणे पालन करतो. त्यामुळेच त्या विमानाच्या उड्डाणासाठी तातडीने नव्या क्रूची व्यवस्था केली.
