अहमदनगर (इंडिया दर्पण वृत्तसेवा) – कोणत्याही लग्न सोहळ्यामध्ये सर्वात महत्त्वाचा विधी म्हणजे मंगलाष्टके होय, कारण हळद समारंभ, मेहंदी, वरात जेवणावळी, मानपान यापेक्षा सर्वात जास्त महत्त्वाचे स्थान मंगलाष्टकांना असते, तरच लग्न समारंभ खऱ्या अर्थाने संपन्न झाला असले समजले जाते. हिंदू धर्मात किंवा भारतीय संस्कृतीत याला महत्त्वाचे स्थान आहे. परंतु अहमदनगर शहरात मंगलाष्टकाशिवाय एक लग्न समारंभ पार पडला, त्यामुळे ‘सावधान… ‘ वगैरे चा निनाथ आवाज तिथे घुमलाच नाही, मात्र त्याऐवजी छत्रपती शिवरायांचे पोवाडे सर्वांना ऐकू येत होते, नेमके काय घडले येथे…
खर्चाला फाटा…
आपले लग्न हे आठवणीत राहावे म्हणून अनेकजण वेगवेगळ्या प्रकारे लग्न सोहळा करत असतात. कुणी हवेत लग्न करतो तर कुणी पाण्यात लग्न करतो. अहमदनगरच्या थोरात आणि धिसले परिवारातील योगिनी आणि विकास यांच्या विवाहसोहळ्यात मंगलअष्टका म्हटली गेली नाहीत. मात्र या दोन्ही परिवाराने हा विवाह सोहळा हटक्या पद्धतीने पार पाडला. केवळ आठवणीत राहण्यासाठी नाही तर या विवाह सोहळ्यातून छत्रपती शिवाजी महाराजांचे विचार, त्यांचे असलेले आपल्या जीवनातील अनन्य साधारण महत्व आलेल्या वऱ्हाडी मंडळींपर्यंत पोहचावे हा त्यांचा हेतू होता. यासाठी त्यांनी मंगल अष्टकाऐवजी छत्रपती शिवाजी महाराजांची आरती करत लग्न सोहळा पार पाडला. विशेष म्हणजे आलेल्या पाहुण्यांचा सत्कारावर होणाऱ्या खर्चाला फाटा देत त्यांनी तो खर्च शिक्षण संस्था आणि विविध मंदिरांना दान म्हणून दिला.
उच्चशिक्षीत कुटुंब
गोरक्षनाथ थोरात हे रयत बँकेमध्ये शाखाधिकारी म्हणून निवृत्त झालेले असून त्यांची पत्नी शैला थोरात या धार्मिक वृत्तीच्या गृहीणी आहेत. आपल्या मुलांना उच्च शिक्षण देण्यासाठी त्यांनी मोठी मेहनत घेतली. त्यांची एक मुलगी शिक्षिका आहे तर मुलगा अभिषेक थोरात हा इंजिनियर झाल्यानंतर एका अमेरिकन कंपनीत नोकरीला लागला. तर दुसरी मुली योगीनी थोरात ही एमसीएसची पदवी घेऊन पुण्यात एका कंपनीत नोकरी करते. तसेच करमाळा येथील नवरा मुलगा विकास किसन धिसले हा बीटेक आणि एमबीए पदवी घेऊन उच्चपदस्थ कंपनीत पुणे येथे जॉब करत आहे.
शिवाजी महाराजांचे निस्सिम भक्त
दोन्ही कुटुंबं उच्चशिक्षित आहेत. त्यामुळे छत्रपती शिवाजी महाराज यांनी या महाराष्ट्राला प्रेरणा दिली, छत्रपती शिवाजी महाराजांचे थोरात कुटुंब हे निस्सीम भक्त आहेत. त्यामुळे हे लग्न छत्रपती शिवाजी महाराजांच्या आरतीने आणि स्फूर्तीने व्हावे, अशी दोन्ही कुटुंबियांची इच्छा होती. त्यानुसार हा अनोखा विवाह सोहळा मोठ्या थाटात संपन्न झाला. या अनोख्या विवाह सोहळ्याची शहरासह जिल्ह्यात जोरदार चर्चा सुरू आहे. तसेच या दोन्ही परिवाराचा आदर्श इतरांनी घ्यावा असे म्हटले जात आहे.
