अहमदनगर (इंडिया दर्पण वृत्तसेवा) – अप्पर जिल्हाधिकऱ्यांसह वरिष्ठ अधिकारी, कर्मचारी आणि एकूण ३२ जणांवर एकाचवेळी गुन्हा दाखल झाला आहे. त्यामुळे जिल्ह्यात एकच खळबळ उडाली आहे. एमआयडीसी पोलीस ठाण्यात हा गुन्हा दाखल झाला आहे. त्यात अपर जिल्हाधिकारी, उपविभागीय अधिकारी (प्रांत), तहसीलदार, मंडळ अधिकारी, तलाठी व सह दुय्यम निबंधक अशा एकूण ६ अधिकारी व कर्मचारी यांचेसह ३२ खासगी व्यक्तींचा समावेश आहे. या सर्वांवर भ्रष्टाचार प्रतिबंधक अधिनियम अंतर्गत गुन्हे दाखल करण्यात आला आहे. गुन्हा दाखल झालेले सर्व अधिकारी कर्मचारी हे २००६ च्या दरम्यान अहमदनगर येथे कार्यरत होते.
पोलिसांनी दिलेल्या माहितीनुसार, ,३ जानेवारी २००६ रोजीचे पूर्वी ते ६ जानेवारी २००६ रोजी मौजे वडगांव गुप्ता शिवारातील गट नं.२०३ क्षेत्र २ हेक्टर, ९७ आर पोट खराबा ०.०९ आर. गट नं.२०५ एकुण क्षेत्र १ हेक्टर ३४ आर ही कनिष्ट महार वतन हाडोळा इनाम वर्ग ६ब ची जमिन जुन्या शर्तीवर करणेसाठी अटी व शर्तीवर तत्कालीन तहसिलदार अहमदनगर यांनी बेकायदेशीर परवानगी दिली आहे. यातील तहसिलदार एल. एन. पाटिल यांनी काढलेल्या आदेशास, तत्कालीन तलाठी एल. एस. रोहकले, दुर्गे, तत्कालीन मंडळ अधिकारी, नालेगांव यांनी मदत केली आहे व खरेदी विक्री व्यवहाराच्या नियमबाहय फेरफार- नोंदी घेऊन खासगी व्यक्ती उत्कर्ष पाटिल व अजित लुकड यांना मदत केली आहे.
सदरचा आदेश बेकायदेशीर असल्याची माहिती तत्कालीन अपर जिल्हाधिकारी व्ही. टी. जरे आणि तत्कालीन उपविभागीय अधिकारी राजेंद्र मुठे यांना होती. तरीदेखील त्यांनी कुठलीही कारवाई न करता, बेकायदेशीर व्यवहारात सहभाग घेतला. या व्यवहारास एक प्रकारे प्रोत्साहन दिले आहे. त्याचबरोबर लोकसेवक दिलीप बबन निराली, तत्कालीन सह दुय्यम निबंधक, अहमदनगर- २ यांनी खरेदी विक्रीचे बेकायदेशीरपणे दस्त नोंदविले.
तसेच नमुद जमिनीचे भोगवटादार दिनकर आनंदा शिंदे, विनायक शंकर शिंदे, बाबु आनंदराव शिंदे, मोहन आनंदराव शिंदे, वामन किसन शिंदे, यादव किसन शिंदे, सदाशिव केशव शिंदे, रामभाऊ केशव शिंदे, सुनिल केशव शिंदे, यादव केशव शिंदे, श्रीमती मालनबाई केशव शिंदे, श्रीमती लता शांतवण भाकरे, अरुण दगडु शिंदे, शालनबाई दगडु शिंदे, लक्ष्मण रामचंद्र शिंदे, मथुरा विष्णु शिंदे, संदिप विष्णु शिंदे, सुनिता रतन गायकवाड, नंदा शाम घाटविसावे, शालुबाई शाहुराव प्रभुणे, मच्छिंद्र आनंदाव शिंदे, लिलाबाई चंद्रभान पाडळे, शोभा बुध्दीराम ठाकुर, तसेच संमती देणार वत्सलाबाई तुकाराम पाचारणे, सुशिला शांतवण घाटविसावे, तुळसाबाई मारुती नरवडे, छबुबाई भिवाजी साळवे, इंद्रायणी विठठल जाधव, वत्सला वामन जाधव, कौसल्या दामु जगताप यांचे जनरल मुखत्यार उत्कर्ष सुरेश पाटील, रा. श्रमिकनगर आनंदऋषीजी मार्ग अहमदनगर व जमिन खरेदी करणारे अजित कचरदास लुंकड, रा. आनंद दर्शन अपार्टमेंट, मार्केट यार्ड, अहमदनगर यांना सदरची जमिन ही महार वतन हाडोळा इनाम वर्ग ६ ची जमिन असल्याचे माहित असू देखील त्यांनी वरिल नमुद तहसिलदार यांना सदर जमिन जुन्या शर्तीवर करणेसाठी अटी व शर्तीवर परवानगी देण्यासाठी मदत करुन, खोटे कागदपत्र तयार करून, सदर जमिनीची खरेदी विक्री व्यवहार करुन दस्त नोंदणी करुन ७/१२ उता-यावर व फेरफार नोंदी घेतलेल्या आहेत व दस्त तयार करून शासनाची फसवणुक केली आहे.
या सर्व प्रकाराबाबत एम.आय.डी.सी. पो.स्टे., जि.अहमदनगर येथे भ्रष्टाचार प्रतिबंध अधिनियम सन १९८८ चे कलम १३(१)(ड) सह १३(२) सह भा.दं.वि. क.१६७ ४२० १०९ प्रमाणे दि.१९/०७/२०२३ रोजी गुन्हा दाखल करण्यात आला आहे. सदर गुन्हयाचा पुढील तपास पोलीस उप अधीक्षक प्रविण लोखंडे, लाचलुचपत प्रतिबंधक विभाग, अहमदनगर हे करीत आहेत.
