इंडिया दर्पण ऑनलाईन डेस्क – बॉलिवूडमध्ये सध्या अनेक बिग बजेट चित्रपट येऊ घातले आहेत. अनेक चित्रपटांचे चित्रीकरण सुरू आहे, तर दुसरीकडे अनेक चित्रपट प्रदर्शनासाठी सज्ज आहेत. या सगळ्यामध्ये जान्हवी कपूरचा ‘मिली’ चित्रपट जबरदस्त चर्चेत आला आहे. काही दिवसांपूर्वीच या चित्रपटाचा टीझर प्रदर्शित झाला. या चित्रपटाचा थरारक ट्रेलरही प्रदर्शित झाला आहे.
हा ट्रेलर पाहून तिचे चाहते या चित्रपटासाठी फार उत्सुक झालेले दिसत आहेत. सत्य घटनेवर आधारित ‘मिली’ चित्रपटात जान्हवी कपूर ‘मिली नौटियाल’ या विद्यार्थीची भूमिका साकारत आहे. या ट्रेलरच्या सुरुवातीला ‘मिली’ प्रेक्षकांना तिची औपाचारिक ओळख करून देते. ती आपल्यासोबतच तिच्या वडिलांचीही ओळख करून देते. या ट्रेलरमधून वडील – मुलीच्या प्रेमळ नात्याची झलक दिसते.
स्वावलंबी होण्यासाठी मिली एका फूड सेंटरमध्ये काम करायला सुरुवात करते. एक दिवस ती या फूड सेंटरच्या फ्रीझिंग रूममध्ये अडकते आणि या चित्रपटातील थरार सुरु होतो. या खोलीत उणे १६ म्हणजेच मायनस १६ तापमान असते. ती या खोलीतून बाहेर पडण्याचा प्रयत्न करते पण तिला ते सहज शक्य होत नाही. जीवघेण्या थंडीपासून वाचण्यासाठी ती स्वत:भोवती प्लॅस्टिक आणि टेप गुंडाळते. बाहेरही सगळेजण तिला शोधण्याचे अथक प्रयत्न करतात. त्या खोलीत तिला कोणकोणत्या समस्यांना समोरे जावे लागते तसेच यातून ती कशी बाहेर पडते हे या चित्रपटातून उलगडणार आहे.
या चित्रपटाची निर्मिती बोनी कपूर यांनी केलेली आहे. या चित्रपटाच्या माध्यमातून जान्हवी पहिल्यांदाच तिच्या वडिलांची निर्मिती असलेल्या चित्रपटात काम करणार आहे. या चित्रपटाचे दिग्दर्शक मथुकुट्टी झेवियर आहेत. या चित्रपटाचे संगीत ए. आर. रहमान यांचे आहे. पुढील महिन्यात ४ नोव्हेंबर रोजी हा चित्रपट प्रदर्शित होणार आहे.
Actress Janhvi Kapoor Mili Movie Trailer
Bollywood Entertainment
