अंडरवर्ल्ड डॉनच्या प्रेमात होती ही अभिनेत्री; एका प्रसंगाने मिळाली आयुष्याला कलाटणी

विशेष प्रतिनिधी, मुंबई

अंडरवर्ल्ड आणि बॉलिवूड यांचे फार जुने कनेक्शन आहे. अनेक चित्रपटांना अंडरवर्ल्ड कडूनच पैसा मिळतो, असे म्हटले जाते. त्यामुळेच अनेकदा अंडरवर्ल्ड डॉन आणि बॉलिवूड अभिनेत्री यांच्या प्रेमाच्या कथा ऐकायला मिळतात. पण ज्या अभिनेत्रींनी अशा डॉनशी लग्न केलं, त्यांचं करिअर तिथेच थांबलं. अशीच एक गोष्ट आम्ही आज सांगणार आहोत. ती आहे हाजी मस्तान आणि अभिनेत्री सोना हिची.

अभिनेत्री सोना हिचा चेहरा अभिनेत्री मधुबाला हिच्याशी मिळताजुळता होता. हाजी मस्तानला मधुबालाशीच लग्न करायचे होते. पण, आपलं प्रेम तो तिला सांगणार याआधीच मधुबालाचे निधन झाले. मधुबालाच्या मृत्यूनंतर तो फारच उदास झाला पण  त्यानंतर त्याच्या आयुष्यात आली सोना. सोना जेव्हा चित्रपट सृष्टीत आली, तेव्हा अनेकांना मधुबालाच परतल्याचा भास झाला. चेहऱ्याच्या ठेवणीपासून त्यांच्या हसण्यापर्यंत सगळ्याच गोष्टींमध्ये सारखेपणा असल्याने चित्रपटसृष्टीतील लोकांनाही धक्का बसला. दोन व्यक्तींमध्ये एवढं साम्य कसं असू शकतं, असाच प्रश्न सगळ्यांना पडला होता.

हाजी मस्तानला देखील सोना बद्दल कळलं. त्याने जेव्हा तिला पाहिलं, तेव्हा त्यालाही मधुबालालाच पाहिल्याचा भास झाला. तेव्हाच त्याने तिच्याशी लग्न करण्याचा निर्णय घेतला. हाजी मस्तानने थेट तिच्या घरी जाऊन तिच्या आईकडे लग्नाचा प्रस्ताव ठेवला, आणि सोनानेही त्याला मान्यता दिली.

सोनाचे खरे नाव होते शाहजहां बेगम. १९८६ पासून तिने चित्रपटात काम करण्यास सुरुवात केली. बॉक्स ऑफिसवर काही तिला फार यश मिळाले नाही. त्यातच १९९४ मध्ये हाजी मस्तानच्या मृत्यूनंतर तिची अवस्था अधिकच बिकट झाली. त्यानंतर तिच्या आयुष्याला इतकी उतरती कळा लागली की दोन वेळचे जेवण मिळणेही मुश्किल झाले.

हाजी मस्तानची सारी संपत्ती तिच्या नावावर असल्याने त्याचा सगळा परिवार तिचा दुश्मन बनला होता. आपला जीव वाचवण्यासाठी ही संपत्ती सोनाने हाजी मस्तानच्या कुटुंबीयांना देऊन टाकली आणि स्वत: हलाखीत जीवन जगू लागली. सोना आजही मुंबईत राहते, अशी चर्चा आहे पण ती कुठे असते, कशी राहते, याबाबत कोणालाच काहीही माहिती नाही.