ठाणे (इंडिया दर्पण वृत्तसेवा) – दाक्षिणात्य अभिनेता विजय देवरकोंडा आणि अनन्या पांडे हे नवी मुंबईतील एका कार्यक्रमात गेले होते. बॉलिवूडमध्ये पदार्पणासाठी सज्ज झालेल्या विजयचा चाहतावर्ग किती मोठा आहे, याची प्रचिती नवी मुंबईत झालेल्या एका कार्यक्रमात आली. मुंबईत आलेल्या विजयने यावेळी चाहत्यांसाठी मुंबईत बोलायला सुरुवात केली आणि चाहत्यांनी एकच जल्लोष केला. याच जल्लोषात ही गर्दी व्यासपीठाच्या दिशेने जाऊ लागली. ही गर्दी नंतर इतकी प्रचंड झाली की विजय आणि अनन्याला कार्यक्रमातून मध्येच निघावे लागले.
विजय देवरकोंडा आणि अनन्या पांडे हे दोघे सध्या त्यांच्या आगामी ‘लायगर’ या चित्रपटाचं जोरदार प्रमोशन करत आहेत. त्यासाठी त्यांनी मध्यंतरी ट्रेनमधूनही प्रवास केला. नुकतेच ते नवी मुंबईतील मॉलमध्ये प्रमोशनसाठी आले होते. विजय आणि अनन्याने सोशल मीडियावर या कार्यक्रमाची माहिती चाहत्यांना दिली होती. आपले आवडते कलाकार भेटायला येणार असल्याने चाहत्यांनी मॉलमध्ये तुडुंब गर्दी केली.
महाराष्ट्रात आल्याने विजयनेही यावेळी मराठीतून बोलायला सुरुवात केली. त्याच्या तोंडून मराठी ऐकताच चाहत्यांनी एकच कल्ला केला. हळूहळू ही गर्दी स्टेजच्या जवळ जाऊ लागली. बॅरिकेट्सजवळ गर्दी पोहोचली. विजयने चाहत्यांच्या जल्लोषावर नियंत्रण ठेवण्याचा प्रयत्न केला. आम्ही इथेच आहोत, कृपया शांत व्हा, असे सांगताना तो दिसला. मात्र, परिस्थिती हाताबाहेर गेली. आणि कलाकार आणि गर्दीची सुरक्षा लक्षात घेऊन टीमला कार्यक्रमस्थळ सोडावे लागले.
विजय देवरकोंडा ‘लायगर’ या चित्रपटातून हिंदी चित्रपटसृष्टीत पदार्पण करत आहे. या चित्रपटात बॉक्सिंग चॅम्पियन माइक टायसनदेखील झळकणार आहे. हा एक स्पोर्ट्स अॅक्शन चित्रपट आहे. हा चित्रपट २५ ऑगस्टला प्रदर्शित होत आहे. हिंदी, तमिळ, तेलुगु, कन्नड आणि मल्याळम भाषेत हा चित्रपट प्रदर्शित होणार आहे.
Actor Vijay Devarkonada Ananya Pandey Left from Program in New Mumbai Mall
