इंडिया दर्पण ऑनलाईन डेस्क – छोट्या पडद्यावरील मालिकांइतका दुसरा विरंगुळा नाही. त्यामुळे आपल्या आवडत्या मालिका कधीच संपू नयेत, असं प्रेक्षकांना नेहमीच वाटत असतं. अशीच एक मालिका म्हणजे झी मराठीवरील ‘माझी तुझी रेशीमगाठ’. श्रेयस तळपदे, प्रार्थना बेहरे यांची प्रमुख भूमिका असलेली ही मालिका चांगलीच लोकप्रिय झाली होती. लोकप्रियतेच्या शिखरावर असताना ही मालिका बंद झाली. त्यामुळे प्रेक्षक हळहळले होते. आता पुन्हा एकदा या मालिकेचा पुढचा भाग येणार असल्याची चर्चा आहे. त्यामुळे प्रेक्षक आनंदात आहेत.
श्रेयसच्या व्हिडीओ ठरला कारण
झी मराठीवरील या मालिकेने प्रेक्षकांना अक्षरशः वेड लावलं होतं. ही मालिका तरुणाईच्या गळ्यातील ताईत बनली होती. मालिकेतील श्रेयस तळपदे आणि प्रार्थना बेहेरे यांची जोडी प्रेक्षकांना प्रचंड आवडली होती. मालिकेतील छोट्या परीने तर घराघरात लोकप्रिय झाली. काही कारणास्तव मालिकेने फार कमी कालावधीतच प्रेक्षकांचा निरोप घेतला. त्यामुळे प्रेक्षकांची निराशा झाली होती. आता या मालिकेचा दुसरा सीझन सुरू होणार असल्याच्या सोशल मीडियावर चर्चा आहेत. या चर्चेला कारण ठरलाय तो श्रेयसने शेअर केलेला एक व्हिडिओ.
काय आहे व्हिडिओत ?
‘माझी तुझी रेशीमगाठ’ ही मालिका लोकप्रिय असताना ही मालिका बंद करण्यात आली. तिच्याजागी दुसरी मालिका लावण्याचा निर्णय निर्मात्यांनी घेतला. प्रेक्षकांच्या आग्रहास्तव मालिका बंद न करता ६.३० वाजता सुरू करण्यात आली. मात्र टीआरपी नसल्याने मालिका अखेर बंद करण्यात आली. आता श्रेयसने केलेल्या पोस्टमुळे प्रेक्षकांच्या आशा पल्लवित झाल्या आहेत. श्रेयसने एक व्हिडिओ शेअर करत लिहिलं, ‘ती वेळ ज्याची तुम्ही सगळेच आतुरतेने वाट पाहत होतात. आमची ही रेशीमगाठ कधीही तुटायची नाही.’ या व्हिडिओत तो ‘माझी तुझी रेशीमगाठ’ चे दिग्दर्शक अजय मयेकर यांना भेटला आहे. त्यामुळे ते दोघे मिळून पुन्हा रेशीमगाठच्या दुसऱ्या सीझनबद्दल बोलत असल्याचा अंदाज प्रेक्षकांनी बांधला आहे. अभिनेत्री प्रार्थना बेहरे आणि स्वाती देवल यांनीही यावर प्रतिक्रिया दिल्या आहेत.
प्रार्थनाने यावर प्रतिक्रिया देत लिहिलं, ‘माझ्याही तारखा फ्री आहेत. मी तुम्हाला खूप मिस करतेय.’ तर स्वाती देवल म्हणते, ‘हो माझ्याही तारखा आहेत. मी ही फ्री आहे. त्या दिवसांना मिस करतेय.’ तर नेटकऱ्यांनी आम्हाला ‘माझी तुझी रेशीमगाठ’ चा दुसरा सीझन हवा आहे अशा प्रतिक्रिया दिल्या आहेत.
