इंडिया दर्पण ऑनलाईन डेस्क – मराठी मालिकांमधील चॉकलेट बॉय म्हणून श्रेयस तळपदे याची ओळख आहे. मालिकांमधूनच त्याने चित्रपटसृष्टीत पदार्पण केले. तेथे स्वतःचे स्थान निर्माण केल्यानंतर मग तो बॉलिवूडमध्ये गेला. ‘इकबाल’ सारख्या चित्रपटातून त्याने आपल्या अभिनयाची चुणूक दाखवून दिली. आणि झी मराठीवरील ‘माझी तुझी रेशीमगाठ’ मालिकेच्या माध्यमातून त्याने पुन्हा एकदा छोट्या पडद्यावर पदार्पण केले. आता पुन्हा श्रेयस चर्चेत आहे, पण एका वेगळ्याच कारणासाठी.
मराठी चित्रपटसृष्टीतून आपल्या करिअरची सुरुवात करणाऱ्या श्रेयसनं बॉलिवूडमध्येही स्वतःची वेगळी ओळख निर्माण केली. मध्यंतरी ‘पुष्पा’ या चित्रपटात अल्लू अर्जुनला आवाज दिल्याने त्याची लोकप्रियता आणखीनच वाढली. सोशल मीडियावर श्रेयस तळपदेच्या ‘कमाल धमाल मालामाल’ या २०१२ च्या चित्रपटातील एक सीन प्रचंड व्हायरल होत आहे. या सीनमुळेच श्रेयसला माफी मागावी लागली आहे. आपल्या पोस्टमध्ये तो सीनसुद्धा श्रेयसने जोडला आहे. नुकतंच श्रेयस तळपदेने त्याच्या ट्विटर अकाऊंटवर एक जाहीर माफी मागणारी पोस्ट शेअर केली.
‘कमाल धमाल मालामाल’ या चित्रपटाचं दिग्दर्शन प्रियदर्शन यांनी केलं आहे. या चित्रपटात श्रेयससह नाना पाटेकर, ओम पुरी, परेश रावल असे दिग्गज कलाकार आहेत. चित्रपटातील एका दृश्यात श्रेयस एक टेम्पो थांबवत असतो. मात्र, टेम्पो थांबवताना श्रेयस त्याच्या पुढच्या भागावर लाथ मारतो. श्रेयस जिथे लाथ मारतो आहे, त्या ठिकाणी गाडीवर ओम (ॐ) दिसतो. हिंदू धर्मात ओमला खूप महत्त्व आहे. हा सीन सोशल मीडियावर प्रचंड व्हायरल होत आहे, आणि या चित्रपटावर आणि पर्यायाने श्रेयस तळपदेवर टीका होत आहे. याच टिकेवर श्रेयसने अत्यंत नम्रपणे उत्तर देत प्रेक्षकांची माफी मागितली आहे.
ट्वीटमध्ये श्रेयस म्हणतो, “चित्रपटाचं शूटिंग करतेवेळी वेगवेगळ्या गोष्टींचा विचार करावा लागतो. या चित्रीकरणादरम्यान एखाद्याची मानसिकता, दिग्दर्शकाची मागणी, या सगळ्या गोष्टींचा विचार करावा लागतो. याचा अर्थ जे तुम्ही पाहताय त्याचं मी स्पष्टीकरण देतोय किंवा समर्थन करतो आहे, असं अजिबात नाही. त्या सीनमध्ये जे झालं ते अनावधानाने झालं आणि मी त्याबद्दल माफी मागतो. मी ही गोष्ट माझ्या दिग्दर्शकाच्या निदर्शनास आणून द्यायला हवी होती. पण यापुढे मी पुन्हा अशी कोणतीही कृती करणार नाही ज्यामुळे लोकांच्या भावना दुखावल्या जातील.” श्रेयसने दिलेल्या या उत्तराचं सोशल मीडियावर प्रचंड कौतुकही होत आहे.
Actor Shreyas Talpade Apologies Viral Video
