इंडिया दर्पण ऑनलाईन डेस्क – बॉलीवूडचा किंग खान अर्थात शाहरुख खान याच्या अडचणींमध्ये वाढ होताना दिसत आहे. त्याची पत्नी गौरी खान हिच्याविरोधात गुन्हा दाखल झाल्याची घटना ताजी असतानाच शाहरुखच्या ‘मन्नत’ बंगल्यात दोन तरुण घुसल्याचे समोर आले आहे. हे दोघेही ‘मन्नत’च्या तिसऱ्या मजल्यापर्यंत पोहोचले होते. घरी कडेकोट सुरक्षा असतानाही ही घटना घडल्याने आश्चर्य व्यक्त होत आहे.
दोन तरुण सुरक्षा रक्षकांची नजर चुकवत भिंतीवरून उडी घेत शाहरुखच्या ‘मन्नत’ बंगल्यामध्ये शिरले. या दोन्ही तरुणांना अटक करण्यात आली आहे. या तरुणांनी ‘मन्नत’मध्ये प्रवेश तर केलाच त्यानंतर ते थेट बंगल्याच्या तिसर्या मजल्यावर पोहोचले होते. नंतर सुरक्षा रक्षकांना ते दिसले आणि त्यांनी त्या तरुणांना पकडलं. परवानगीशिवाय घरात प्रवेश करण्याबरोबरच आयपीसीच्या इतर कलमांतर्गत या तरुणांविरोधात गुन्हा नोंदविण्यात आला आहे. आता त्यांची चौकशी केली जाईल, असं पोलिसांनी सांगितलं.
हे दोन्ही तरुण गुजरातमधील सूरतचे आहेत आणि त्याचं वय २० ते २५ वर्षांच्या दरम्यान आहे. या दोघांनी ‘मन्नत’मध्ये प्रवेश केला, तेव्हा शाहरुख खान घरी नव्हता. पोलिसांनी या दोघांवरही गुन्हा दाखल करून चौकशी सुरू केली आहे. पोलिसांनी या दोघांनाही हे कृत्य का केलं, असं विचारलं असता आम्ही शाहरुख खानचे चाहते असल्याचे त्यांनी सांगितले. शाहरुखला भेटण्यासाठी ते गुजरातहून आले होते.
Actor Shahrukh Khan Mannat Bungalow Security 2 Arrested
