परभणी (इंडिया दर्पण वृत्तसेवा) – अलिकडे रिल बनवून सोशल मीडियावर पोस्ट फॅड चांगलेच वाढले आहे. कोण कशाची रिल बनविल याचाही काही नेम राहिला नाही. अनेक जण थरार अनुभवत रिल शुट करीत असल्याचेही दिसते. असेच धाडस शाळकरी विद्यार्थ्यांच्या जीवावर बेतले. चार शाळकरी विद्यार्थी चालत्या वाहनावर स्वार होऊन रिल बनवित होते. अज्ञात वाहनाने त्यांना धडक दिली. यात दोघांनी जीव गमावला तर दोघे गंभीर जखमी आहेत. ही दुर्दैवी घटना पाथरी तालुक्यातील डाकूपिंप्री येथे प्रजासत्ताक दिनी घडली.
प्रजासत्ताक दिनाचा सोहळ्यात सहभागी होण्यासाठी स्वप्निल ज्ञानेश्वर चव्हाण, राहुल महादू तिथे, योगानंद कैलास घुगे, शंतनू सोनवने हे चारही विद्यार्थी एकाच दुचाकीवरून शाळेत चालले होते. वाटेत त्यांनी मोबाइलवरून रिल बनविणे सुरू केले. वेगात असताना त्यांच्या दुचाकीला अज्ञात वाहनाने धडक दिली. यात चारही विद्यार्थी गंभीर जखमी झाले. त्यांना उपचारासाठी अंबाजोगाईला आणण्यात आले. त्यातील स्वप्निल चव्हाण या विद्यार्थ्याची प्रकृती चिंताजनक असल्याने त्याला तातडीने लातूरला हलविण्यात आले होते. अंबाजोगाईत उपचार घेणाऱ्या शंतनू कांचन सोनवणे याचा गुरुवारी सायंकाळी मृत्यू झाला, तर लातूरला उपचार घेणाऱ्या स्वप्निलचा शुक्रवारी सकाळी मृत्यू झाला.
चौघेही वर्गमित्र
पाथरी तालुक्यातील डाकूपिंप्री येथील इयत्ता नववीतील हे चारही विद्यार्थी सकाळी १०.३० च्या सुमारास दुचाकीवरून कानसूर फाटा येथील हायस्कूलमध्ये ध्वजारोहणासाठी निघाले होते. डाकूपिंप्री ते कानसूर फाटा येथून जाताना शाळेच्या अगदी जवळ काही अंतरावर दुचाकीवरून ते मोबाइलमध्ये व्हिडीओ रिल बनवत होते. त्यांचा व्हिडीओ मोबाइलमध्ये कैद झाला. मात्र, काही वेळात त्यांच्या दुचाकीला अज्ञात वाहनाने धडक दिल्याने गंभीर अपघात झाला.
घटनास्थळी विदारक चित्र
घटनास्थळावरील चित्र अतिशय विदारक होते. एका विद्यार्थ्याचा हात अक्षरशः रस्त्यावर तुटून पडला होता. घटनेचे वृत्त येऊन धडकताच डाकूपिंप्री गावावर शोककळा पसरली.
Accident Two Wheeler Reel 2 Student Death 2 Injured
