अज्ञात वाहनाच्या धडकेत पादचारी ठार
नाशिक : भरधाव अज्ञात वाहनाने दिलेल्या धडकेते अनोळखी पादचारी ठार झाला. हा अपघात महामार्गावरील द्वारका भागात झाला. याप्रकरणी भद्रकाली पोलीस ठाण्यात अपघाताची नोंद करण्यात आली आहे. सदर अनोळखी व्यक्ती रविवारी (दि.१८) सायंकाळच्या सुमारास उड्डाणपूलाखालून झाकीर हुसेन दवाखान्याकडे पायी जात असतांना हा अपघात झाला. उड्डाण पुलाखालील पोल नं. ९२ समोरून तो रस्ता ओलांडत असतांना धुळयाकडे भरधाव जाणा-या अज्ञात वाहनाने त्यास धडक दिली. या अपघातात त्याचा मृत्यु झाला. याप्रकरणी जावेद खान (रा.मनमाड) यांनी दिलेल्या तक्रारीवरून अज्ञात वाहनानवरील चालका विरूध्द गुन्हा दाखल करण्यात आला असून अधिक तपास उपनिरीक्षक राऊत करीत आहेत.
दोन मोटारसायकलींची चोरी
नाशिक : शहरात वाहनचोरीची संख्या दिवसागणीक वाढत असून, वेगवेगळय़ा भागातून नुकत्याच दोन मोटारसायकली चोरट्यांनी चोरून नेल्या. याप्रकरणी आडगाव आणि अंबड पोलीस ठाण्यात गुन्हे दाखल करण्यात आले आहेत. तपोवनातील शुभम संतोष पाटेकर (रा.पुष्पांजली अपा.चव्हाणनगर) यांची स्प्लेंडर एमएच १५ एएन १६८० दि.१४ डिसेंबर रोजी रात्री त्यांच्या सोसायटीच्या पार्किंगमध्ये लावलेली असतांना चोरट्यांनी चोरून नेली. याप्रकरणी आडगाव पोलीस ठाण्यात गुह्याची नोंद करण्यात आली असून अधिक तपास हवालदार थेटे करीत आहेत. दुसरी घटना सिडकोतील भोळे मंगल कार्यालय भागात घडली. सुनिलदत्त पंढरीनाथ मिस्तरी (रा.शुभम पार्क,भोळे मंगल कार्यालयाजवळ) यांनी तक्रार दाखल केली आहे. मिस्तरी यांची अ‍ॅक्टीव्हा एमएच १५ जीवाय ८४९६ गेल्या रविवारी (दि.१८) त्यांच्या इमारती खाली पार्क केलेली असतांना चोरट्यांनी पळवून नेली.याप्रकरणी अंबड पोलीस ठाण्यात चोरीची नोंद करण्यात आली असून अधिक तपास पोलीस नाईक परदेशी करीत आहेत.
