नाशिक – कारच्या धडकेत दुचाकीस्वार ठार, तर दुस-या घटनेत टेम्पोच्या धडकेत तरूण ठार

कारच्या धडकेत दुचाकीस्वार ठार
नाशिक : भरधाव कारने दिलेल्या धडकेत दुचाकीस्वार ठार झाला. हा अपघात द्वारकार परिसरातील कन्नमवार पुल भागातील उड्डाणपुलावर झाला. याप्रकरणी कारचालकाविरूध्द भद्रकाली पोलीस ठाण्यात गुन्हा दाखल करण्यात आला आहे.प्रकाश धनराज पवार (४२ रा.राजीवनगर) असे अपघातात ठार झालेल्या दुचाकीस्वाराचे नाव आहे. पवार सोमवारी (दि.१७) दुपारच्या सुमारास मालेगावकडून द्वारकाच्या दिशेने उड्डाणपूलावरून दिशेने आपल्या अ‍ॅक्टीव्हा (एमएच १५ एफएक्स २२१६) दुचाकीवर प्रवास करीत असतांना हा अपघात झाला. पाठीमागून भरधाव येणा-या स्विफ्टकारने (एमएच ४१ व्ही ९६९३) दुचाकीस पाठीमागून धडक दिली. हा अपघातात कारचालकाचा आपल्या वाहनावरील ताबा सुटल्याने झाला. या अपघातात प्रकाश पवार यांचा मृत्यु झाला. याप्रकरणी रावसाहेब भागवत (रा.पवननगर) यानी दिलेल्या तक्रारीवरून कारचालक अमोल उत्तम भामरे (रा.खुंटवाडी ता.देवळा) याच्याविरूध्द गुन्हा दाखल करण्यात आला असून अधिक तपास जमादार राऊत करीत आहेत.

….

टेम्पोच्या धडकेत पादचारी तरूण ठार
नाशिक : भरधाव टेम्पोने धडक दिल्याने अस्ताने ता. मालेगाव येथील पादचारी तरूण ठार झाला. हा अपघात आडगाव शिवारातील जयशंकर फेस्टीवल लॉन्स भागात झाला. याप्रकरणी आडगाव पोलीस ठाण्यात मृत्युची नोंद करण्यात आली आहे.देविदास दयाराम उशिरे (३८ रा.अस्ताने पो.झोडगे ता.मालेगाव) असे मृत तरूणाचे नाव आहे. पोलीसांनी दिलेल्या माहितीनुसार देविदास उशिरे सोमवारी (दि.१७) दुपारच्या सुमारास डी.जे.शिर्के कारखान्याकडून जयशंकर फेस्टीवल लॉन्सच्या दिशेने पायी जात असतांना हा अपघात झाला. पाठीमागून भरधाव आलेल्या एमएच १५ डीके १३४३ या टाटा कंपनीच्या टेम्पोने त्यास धडक दिली. या अपघातात तो गंभीर जखमी झाल्याने परिसरातील नागरीकांनी त्यास तात्काळ जिल्हा रूग्णालयात दाखल केले असता वैद्यकीय सुत्रांनी मृत घोषीत केले. अधिक तपास हवालदार गांगुर्डे करीत आहेत