अज्ञात वाहनाच्या धडकेत सायकलस्वार ठार
नाशिक : भरधाव अज्ञात वाहनाने धडक दिल्याने वृध्द सायकलस्वार ठार झाले. हा अपघात तारवालानगर भागात झाला. याप्रकरणी पंचवटी पोलीस ठाण्यात मृत्युची नोंद करण्यात आली आहे. निवृत्ती विठ्ठल सावंत (६० रा.सिताराम कॉम्प्लेक्स,दिंडोरीरोड) असे ठार झालेल्या सायकलस्वाराचे नाव आहे. निवृत्ती सावंत गुरूवारी (दि.२६) आपल्या सायकलवर प्रवास करीत असतांना हा अपघात झाला. सावंत दिंडोरीरोडने तारवालानगर सिग्नलच्या दिशेने प्रवास करीत असतांना रेशिमबंध मंगल कार्यालयासमोर त्यांना अज्ञात वाहनाने धडक दिली. या घटनेत ते गंभीर जखमी झाल्याने कुटूंबियांनी जिल्हारूग्णालयात दाखल केले असता वैद्यकीय सुत्रांनी त्यांना मृत घोषीत केले. अधिक तपास पोलीस नाईक बागुल करीत आहेत.
नाशिक – रविशंकर मार्गावर महिलेची पोत खेचली
नाशिक : भाजीपाला खरेदी करून घराकडे परतणा-या महिलेच्या गळयातील सोन्याची पोत दुचाकीस्वार भामट्यांनी ओरबाडून नेल्याची घटना रविशंकर मार्गावर घडली. याप्रकरणी मुंबईनाका पोलीस ठाण्यात जबरीचोरीचा गुन्हा दाखल करण्यात आला आहे. सुजाता मनोज दास (रा.हरिस्मृती अपा.रविशंकर मार्ग) यांनी याप्रकरणी तक्रार दाखल केली आहे. सुजाता दास या गुरूवारी (दि.२६) सायंकाळच्या सुमारास परिसरातील भाजी मंडई मध्ये भाजीपाला खरेदी करण्यासाठी गेल्या होत्या. भाजीपाला खरेदी करून त्या आपल्या घराकडे पायी जात असतांना ही घटना घडली. हरिस्मृती अपार्टमेंट या घराच्या इमारती जवळ त्या प्रवेशद्वारात प्रवेश करीत असतांना भरधाव आलेल्या दुचाकीस्वारांनी त्यांच्या गळय़ातील सुमारे ६० हजार रूपये किमतीची सोन्याची पोत ओरबाडून नेली. अधिक तपास उपनिरीक्षक जाधव करीत आहेत.
