नाशिक : वडनेर दुमाला मार्गावर भरधाव अज्ञात वाहनाने दिलेल्या धडकेत मुलासमवते दुचाकीवर डबलसिट प्रवास करणारी वृध्द महिला ठार झाल्याची घटना घडली आहे. सत्यभामाबाई निवृत्ती लांडगे (६५ रा.आंबेवाडी,देवळाली कॅम्प) असे मृत महिलेचे नाव आहे. याप्रकरणी उपनगर पोलीस ठाण्यात मृत्यूची नोंद करण्यात आली आहे. लांडगे या शुक्रवारी रात्री आठ वाजेच्या सुमारास वडनेर दुमाला येथून आपल्या मुलाच्या अ‍ॅक्टीव्हा दुचाकीवर डबलसिट प्रवास करीत असतांना हा अपघात झाला. पाठीमागून भरधाव आलेल्या अज्ञात वाहनाने दुचाकीस धडक दिली. या अपघातात मायलेक जखमी झाले. गंभीर असलेल्या सत्यभामाबाई यांना तात्काळ बिटको रूग्णालयात दाखल केले असता त्यांचा उपचारादरम्यान मृत्यू झाला. अधिक तपास पोलीस नाईक होलगीर करीत आहेत.
