नाशिक : टाकळी येथील आर.एस.बेकर्स भागात भरधाव चारचाकी वाहनाने दिलेल्या धडकेत ५० वर्षीय महिला ठार झाली. चंद्रकला रमेश सांगळे (रा.प्रकाश बेकरीजवळ,आगरटाकळी) असे अपघातात ठार झालेल्या महिलेचे नाव आहे. याप्रकरणी उपनगर पोलीस ठाण्यात अज्ञात चालकाविरूध्द अपघाताचा गुन्हा दाखल करण्यात आला आहे. सांगळे या शुक्रवारी सायंकाळच्या सुमारास गायीला गवत घेण्यासाठी जात असतांना हा अपघात झाला. आर.एस.बेकर्स जवळून त्या रस्त्याच्या कडेने पायी जात असतांना पाठीमागून भरधाव आलेल्या अज्ञात वाहनाने त्याना धडक दिली. या अपघातात त्याच्या डोक्यास वर्मी मार लागल्याने कुटूंबियांना त्यांना तात्काळ जिल्हारूग्णालयात दाखल केले असता अतिरक्तश्राव झाल्याने त्यांचा उपचारापूर्वी मृत्यु झाला. याप्रकरणी मुलगा संतोष सांगळे याने दिलेल्या तक्रारीवरून पसार झालेल्या चारचाकी चालकाविरूध्द गुन्हा दाखल करण्यात आला आहे. अधिक तपास उपनिरीक्षक पाटील करीत आहेत.
