नाशिक : दुभाजकावर दुचाकी आदळल्याने १७ वर्षीय दुचाकीस्वाराचा मृत्यु झाल्याची घटना औरंगाबाद रोड वरील नांदूरनाका भागात झाला. तपासात हेल्मेट परिधान न करता स्व:ताच्या मृत्युस कारणीभूत ठरल्याप्रकरणी आडगाव पोलीस ठाण्यात मृत युवकावर सदोष मनुष्य वधाचा गुन्हा दाखल करण्यात आला आहे. बाळू सखा दरोडे (रा.निलगीरीबाग) असे अपघातात ठार झालेल्या तरूणाचे नाव आहे. दरोडे गेल्या शुक्रवारी (दि.५) नांदूरनाक्याकडून माडसांगवीच्या दिशेने आपल्या दुचाकीवर एमएच १९ एए ७७९८ प्रवास करीत असतांना हा अपघात झाला होता. नांदूरनाक्यापासून काही अंतरावर असलेल्या हॉटेल राजगड समोर भरधाव दुचाकी दुभाजकावर आदळल्याने दरोडे गंभीर जखमी झाल्याने त्याचा मृत्यु झाला. पोलीस तपासात चालकाचे आपल्या वाहनावरील नियंत्रण सुटल्याने अपघात झाला. तसेच चालकाने हेल्मेट परिधान न करता भरधाव वाहन चालवून स्व:ताचे मरणास आणि वाहनाच्या नुकसानीस कारणीभूत ठरल्याचे समोर आले आहे. याप्रकरणी हवालदार ज्ञानेश्वर कहांडळ यांनी दिलेल्या तक्रारीवरून गुन्हा दाखल करण्यात आला असून अधिक तपास हवालदार गांगुर्डे करीत आहेत.