नाशिक : भरधाव दोन दुचाकींमध्ये झालेल्या धडकेत एक चालक ठार झाला. हा अपघात नाशिक पुणे मार्गावरील शिंदे टोलनाका भागात झाला. याप्रकरणी नाशिकरोड पोलीस ठाण्यात अपघाताची नोंद करण्यात आली आहे. विजय मनोहर नारखेडे (४८ रा. भांगरे मळा,शिंदेगाव) असे अपघातात ठार झालेल्या दुचाकीस्वाराचे नाव आहे. नारखेडे गेल्या रविवारी (दि.३) एमएच १५ ईआर ८९२८ या दुचाकीने शिंदे टोलनाक्याच्या दिशेने प्रवास करीत असतांना हा अपघात झाला. पाटाच्या मार्गाने टोलनाक्याजवळील नाशिक पुणे महामार्गावर चढत असतांना नाशिकरोडकडून भरधाव आलेल्या दुचाकीने नारखेडे यांच्या मोटारसायकलला पाठीमागून धडक दिली. या अपघातात नारखेडे गंभीर जखमी झाले होते. उपचार सुरू असतांना त्यांचा मंगळवारी (दि.१२) मृत्यु झाला. याप्रकरणी पत्नी मंगल नारखेडे यांनी दिलेल्या तक्रारीवरून मृत्युस कारणीभूत ठरलेल्या सुरेश वामन निंबेकर रा.वडगाव ता.जि.नाशिक या दुचाकी स्वाराविरूध्द अपघाताचा गुन्हा दाखल करण्यात आला आहे. अधिक तपास हवालदार उजागरे करीत आहेत.
