नाशिक – भरधाव एसटीच्या धडकेत दुचाकीचालक ठार; एसटीचालक गजाआड

भरधाव एसटीच्या धडकेत दुचाकीचालक ठार; एसटीचालक गजाआड
नाशिक – भरधाव एसटीने दिलेल्या धडकेत दुचाकीचालक ठार झाल्याची घटना २० एप्रिल रोजी मुंबई-आग्रा महामार्गवरील विमल हॉटेलसमोर, जुना जकातनाका, आडगाव येथे घडली. पोलिसांनी एसटीचालकास अटक केली आहे. याप्रकरणी आनंदा धोंडीराम धोंडगे यांनी आडगाव पोलीस ठाण्यात तक्रार दिली. कल्याण (जि.ठाणे) येथील एसटीचालक संदीप शालीग्राम पाटील (वय ३१) असे अटक करण्यात आलेल्याचे नाव आहे. धोंडगेवस्ती, आडगाव शिवार येथील धोंडीराम रामचंद्र धोंडगे (वय ६७) असे मृत्यू झालेल्या दुचाकीचालकाचे नाव आहे.
पोलिसांच्या माहितीनुसार, संशयित संदीप पाटील मुंबई-आग्रा महामार्गावर एसटी (एमएच २०-बीएल २२६५) भरधाव वेगाने चालवत होता. तो रस्त्याच्या परिस्थितीकडे दुर्लक्ष करत भरधाव वेगाने एसटी घेऊन ओझरकडून नाशिककडे येत होता. आडगावातील जुना जकातनाका येथे दुचाकीचालक धोंडीराम धोंडगे दुचाकी (एमएच १५-एझेड ८१४९)ने रस्ता ओलांडत होता. त्यावेळी पाटीलने भरधाव एसटीची दुचाकील धडक दिली. त्यात धोंडगे यांचा मृत्यू झाला. पुढील तपास सहायक पोलीस उपनिरीक्षक पाटील करत आहेत.

…..

कारच्या धडकेत दोन जण जखमी

नाशिक : भरधाव कारवरील नियंत्रण सुटल्याने कारने संरक्षण भिंतीस धडक दिली. या घटनेत कारचालकासह एकजण जखमी झाल्याची घटना बुधवारी (दि.२१) मध्यरात्री २.३० वाजेदरम्यान त्र्यंबक रोड, महाराष्ट्र पोलीस अकादमी येथे घडली. याप्रकरणी सहायक पोलीस निरीक्षक संजय पाठक यांनी गंगापूर पोलीस ठाण्यात तक्रार दिली. पोलिसांच्या माहितीनुसार, श्रेयस अनिल आंमले भरधाव वेगाने कारने सातपूर रोडने नाशिककडे जात होता.  त्याचे कारवरील नियंत्रण सुटल्याने कारने पोलीस अकादमीच्या संरक्षण भिंतीस धडक दिली. त्यात दोघेजण गंभीर जखमी झाले. पुढील तपास पोलीस हवालदार पठाण करत आहेत.